ԱՄՆ-ն ու Մեծ Բրիտանիան Իրանին մեղադրել են ՌԴ-ին հրթիռներ մատակարարելու մեջ և պատժամիջոցներով սպառնացել

ԱՄՆ-ն ու Մեծ Բրիտանիան պաշտոնապես Իրանին մեղադրել են ուկրաինական պատերազմում Ռուսաստանին փոքր հեռահարության բալիստիկ հրթիռներ մատակարարելու մեջ և ասել, որ միջոցներ կձեռնարկեն՝ ներգրավվածներին պատժելու համար, գրում է AP-ն:

Միացյալ Նահանգների պետքարտուղար Էնթոնի Բլինքենը, Լոնդոն կատարած այցի ժամանակ ելույթ ունենալով Մեծ Բրիտանիայի արտգործնախարար Դեյվիդ Լեմմիի հետ, ասել է, որ Իրանն անտեսել է նախազգուշացումները, որ նման զենքի փոխանցումը կլինի հակամարտության խորը սրացում:

«Ռուսաստանն այժմ ստացել է այդ բալիստիկ հրթիռների բեռները և, հավանաբար, դրանք կօգտագործի մի քանի շաբաթվա ընթացքում Ուկրաինայում՝ ուկրաինացիների դեմ։ Իրանական հրթիռների մատակարարումը Ռուսաստանին հնարավորություն է տալիս օգտագործել այդ զինանոցի մեծ մասը այն թիրախների դեմ, որոնք գտնվում են առաջնագծից շատ ավելի հեռու»,- ասել է Բլինքենը:

Բլինքենի և Լեմմիի ելույթից կարճ ժամանակ անց ԱՄՆ-ը, Մեծ Բրիտանիան և Գերմանիան համատեղ հայտարարություն են տարածել, որում հրթիռների փոխանցումն անվանել են «ուղղակի սպառնալիք եվրոպական անվտանգությանը» և հավելել, որ պատժամիջոցներ կսահմանեն Իրանի դեմ, ներառյալ՝ Իրանի հետ օդային ծառայությունների երկկողմ համաձայնագրերի չեղարկումը և Իրանի բալիստիկ հրթիռների ծրագրում ներգրավված անձանց ու կազմակերպությունների նկատմամբ պատժամիջոցները:

«Մենք կաշխատենք նաև Iran Air-ի դեմ պատժամիջոցներ սահմանելու ուղղությամբ»,- ասվում է հայտարարությունում։