02.06.2026 | 12:47
Արման Ծառուկյանը հայտնել է՝ երբ է անցկացնելու հաջորդ մենամարտը UFC-ում
Լիտվան զանգվածային տարհանման ծրագիր է պատրաստում
Քաղաքականություն
09.09.2024 | 22:33
Լիտվայի ներքին գործերի նախարար Ագնե Բիլոտաիտը հայտարարել է, որ երկիրը զանգվածային տարհանման ազգային ծրագիր կմշակի մինչև հոկտեմբերի սկիզբը, գրում է LRT-ն։
«Յուրաքանչյուր տեղական ինքնակառավարման մարմին ունի իր տարհանման ծրագիրը, սակայն ակնհայտ է, որ մենք պետք է ունենանք ազգային ծրագիր և պատրաստ լինենք այն իրականացնելուն»,- նշել է նախարարը։
Նա ընդգծել է, որ կիբերհարձակումների ֆոնին առաջնահերթ խնդիր է դարձել բնակչության անվտանգությունը։ Հետևաբար, քաղաքացիական պաշտպանությունն ավելի արդիական է, քան երբևէ։
«Ռուսաստանի պատերազմն Ուկրաինայի դեմ շարունակվում է, մեր տարածաշրջանի երկրները ենթարկվում են հիբրիդային և ապատեղեկատվական հարձակումների, իսկ դիվերսիաները մեր նոր իրականությունն են, և պետք է նշել, որ մենք առաջնային դիրքերում ենք, ուստի այսօր առաջնահերթություն է դարձել քաղաքացիական պաշտպանությունը»,- պարզաբանել է Բելոտիտը։
Նա հավելել է, որ ազգային մակարդակով քաղաքացիական պաշտպանության ամրապնդումը բավարար չէ, ուստի որոշվել է համատեղ աշխատել մերձբալթյան երկրների հետ։
«Ժամանակն է համատեղել մեր հնարավորությունները և գործել համակարգված՝ ինչպես տարածաշրջանային, այնպես էլ ԵՄ մակարդակով։ Այո՛, դա շատ թանկ է, բայց մենք պետք է քննարկենք մեր ջանքերը համատեղելու և ԵՄ-ից համապատասխան աջակցություն ստանալու հնարավորությունները»,- ընդգծել է նա։
Ավելի վաղ Վիլնյուսի քաղաքապետ Վալդաս Բենկունսկասը ներկայացրել էր Լիտվայի մայրաքաղաքի պաշտպանության պլանը պատերազմի դեպքում։ Միջոցառումների թվում է քաղաքի տարհանումը։
Բալթյան երկրները նաև պայմանավորվել են ստեղծել «անօդաչու թռչող սարք»՝ դրանց միջոցով իրենց արտաքին սահմանները պաշտպանելու համար։ Բացի այդ, Լիտվայի զինված ուժերը ստացել են ամերիկյան արտադրության Javelin միջին հեռահարության հակատանկային հրթիռային համակարգերի նոր խմբաքանակ։
