Մեր ոչ մի իշխանություն չի գիտակցել կինոյի կարևորությունը, պաշտոնյաների մեծ մասն անճաշակ է. Արման Երիցյան. ՏԵՍԱՆՅՈՒԹ

«Այսօր հայ կինոյի համար ոչ թե վատ, այլ թույլ ժամանակներ են, քանի որ մենք չունենք պրոդյուսերական դպրոց: Կինոն չպետք է գոյատևի միայն պետական ֆինանսավորմամբ, իսկ դրսից ֆինանսավորում հայթայթելու համար հարկավոր են գրագետ պրոդյուսերներ, որոնց պակասը մենք ունենք. մատների վրա կարող ես հաշվել` քանի լավ պրոդյուսեր կա Հայաստանում»,- Factor TV-ի հետ զրույցում տեսակետ է հայտնում կինոռեժիսոր Արման Երիցյանը:

Նրա համոզմամբ` Հայաստանի իշխանությունները վերջին 30 տարում երբեք չեն գիտակցել կինոյի կարևորությունը. «Պետական չինովնիկներին ասես մեկ մայր է ծնում, նրանց իննսուն տոկոսն անճաշակ է: Չկա մթնոլորտ, որը կնպաստի լավ գործերի ստեղծմանը: Այս տասնամյակների ընթացքում հանրության մոտ էլ վատ ճաշակ է ձևավորվել, և այդ վատ ճաշակը թելադրում է պահանջարկ: Իմիջիայլոց ծամածռությունների մշակույթ է դա, որը պետք է մաքրել, իսկ պետությունը թույլ է, դեռ չի կարողանում աշխատեցնել իր ձեռքերը»:

Արման Երիցյանն անդրադառնում է այսօր ստեղծվող ֆիլմերում հայրենասիրության թեմային. «Պետք է ձերբազատվել պաթոսից, «ճակատային» հայրենասիրությունից, ձևականություններից. Հայաստանը գործով է պետք սիրել: Վերջին երեք տասնամյակների, ինչպես նաև խորհրդային տարիների դաստիարակությունն է այդպիսին եղել, որից պետք է հրաժարվել»:

Ռեժիսորը խոսում է նաև Հայաստանում արտադրվող սերիալներից. «Մեր սերիալները շատ կենցաղային են, ցածր մակարդակի: Լավ սցենարիստները գլուխ չեն դնում, որ սերիալի համար սցենար գրեն, պրոդյուսերներն էլ կարծում են, որ խելոք սցենարով սերիալը չի վաճառվի, բայց սխալվում են»:

Մանրամասները` տեսանյութում:

Աննա Բաբաջանյան