23.06.2026 | 09:53
ՀՀ տարածքում ավտոճանապարհներն անցանելի են
ՄԻԵԴ որոշմամբ՝ Ադրբեջանն ու Վրաստանը ադրբեջանցի ընդդիմադիր լրագրողին առևանգելու գործով նրան 21,000 եվրո փոխհատուցում կվճարեն
Քաղաքականություն
05.09.2024 | 17:05
Ադրբեջանցի ընդդիմադիր լրագրող Աֆղան Մուխթարլին շահել է Մարդու իրավունքների եվրոպական դատարանում (ՄԻԵԴ) հայցն ընդդեմ Վրաստանի և Ադրբեջանի։ Այս մասին հայտնում են ադրբեջանական լրատվամիջոցները։
ՄԻԵԴ-ը վճռել է, որ Վրաստանը խախտել է Մարդու իրավունքների եվրոպական կոնվենցիայի 3-րդ հոդվածը (խոշտանգումների արգելքը) և 5-րդ հոդվածը (ազատության և անվտանգության իրավունք) առևանգման, դաժան վերաբերմունքի և Ադրբեջան ապօրինի արտաքսման դեպքերով: Դատարանը նաև որոշել է, որ Ադրբեջանը խախտել է Կոնվենցիայի 5-րդ հոդվածի 3-րդ կետը (անձի ազատության և անձեռնմխելիության իրավունք), ինչպես նաև 8-րդ հոդվածը (անձնական և ընտանեկան կյանքը հարգելու իրավունք):
ՄԻԵԴ-ը որոշել է, որ Վրաստանի իշխանությունները Մուխթարլիին պետք է վճարեն 12,500 եվրո, իսկ Ադրբեջանի իշխանությունները՝ 8,500 եվրո՝ որպես բարոյական վնասի և դատական ծախսերի փոխհատուցում։
«Մարդու իրավունքների եվրոպական դատարանը որոշում է կայացրել Վրաստանում իմ առևանգման հարցով։ Իմ առևանգումը հաստատվել է։ Պատասխանատու են համարվել Ադրբեջանն ու Վրաստանը»,- գրել է լրագրողը ֆեյսբուքի իր էջում։
Նշենք, որ Մուխթարլին Ադրբեջանից հեռացել է 2015 թվականին՝ երկրի ղեկավարության հետ կապված կոռուպցիոն հետաքննությունից հետո։ 2017 թվականի մայիսի 29-ին նրան առևանգել էին Թբիլիսիի կենտրոնում, ծեծել և կամքին հակառակ նստեցնել մեքենա։ Նրան տարել էին սահման և հանձնել Ադրբեջանի ներկայացուցիչներին։
Վրաստանի իշխանությունները հերքում էին Մուխթարլիի առևանգմանն իրենց մասնակցությունը և Ադրբեջանի հատուկ ծառայությունների հետ համագործակցությունը։ Սակայն Վրաստանում տեղի ունեցածից հետո հակահետախուզության և սահմանապահ ծառայությունների ղեկավարներն ազատվել էին աշխատանքից։
Ադրբեջանում լրագրողը մեղադրվել է պետական սահմանն ապօրինի հատելու և մաքսանենգության մեջ՝ դատապարտվելով 6 տարվա ազատազրկման։
2020 թվականին Մուխթարլին ազատ է արձակվել, որից հետո մեկնել է Գերմանիա և այժմ բնակվում է այնտեղ։
Էմմա Չոբանյան
