Բաքվում հերթական հակաֆրանսիական միջոցառումն է կազմակերպվել՝ «Ֆրանսիայի կողմից Մայոտ կղզու օկուպացումը» թեմայով

Ադրբեջանում հերթական հակաֆրանսիական միջոցառումն է անցկացվում՝ «Ֆրանսիայի կողմից Մայոտ կղզու անօրինական օկուպացումը» թեմայով համաժողով։ Նշվում է, որ այն նվիրված է «Ֆրանսիայի անօրինական օկուպացիայի տակ գտնվող Մայոտ կղզուն»։

Ադրբեջանական լրատվամիջոցների  հաղորդմամբ՝ միջոցառմանը մասնակցում են Կոմորների միության և Մայոտ կղզու հասարակական-քաղաքական գործիչներ, որոնք պայքարում են «Ֆրանսիայի օկուպացիայի դեմ» և Մայոտ կղզին Կոմորների միությանը վերադարձնելու համար, ոչ կառավարական կազմակերպությունների ղեկավարներ, քաղաքական կուսակցությունների անդամներ։

Հաղորդվում է, որ  քննարկվում է «Կոմորյան կղզիների ֆրանսիական գաղութացման պատմությունը, Ֆրանսիայի կողմից Մայոտի օկուպացումը և դրա արդյունքում կղզիներին հասցված վնասը, Ֆրանսիայի գաղութային քաղաքականության աշխարհաքաղաքական և տնտեսական շահերն այս տարածաշրջանում, ինչպես նաև միջազգային կազմակերպությունների դիրքորոշումը Կոմորների միության Մայոտ կղզու նկատմամբ»։

Նշենք, որ հուլիսի 17-18-ը Բաքվում անցկացվել էր առաջին կոնգրեսը, որին մասնակցել էին ավելի քան 15 քաղաքական կուսակցությունների և շարժումների առաջնորդներ Կորսիկայից, Մելանեզիայից, Պոլինեզիայից, Կարիբյան և Անտիլյան կղզիներից։ «Ֆրանսիական գաղութատիրությունից» տուժած տարածքների ներկայացուցիչների մասնակցությամբ կոնգրեսը կազմակերպվել էր Գվադելուպայի ազատագրման ժողովրդական միության կողմից և Բաքվի նախաձեռնող խմբի աջակցությամբ։

Ադրբեջանի հակաֆրանսիական արշավի շրջանակում 2023 թվականի հուլիսի 6-ին ստեղծվել է Բաքվի նախաձեռնող խումբը, որը Փարիզի դեմ տարբեր միջոցառումներ է անցկացնում։ Այսօր անցկացվողը 16-րդ միջոցառումն է։

Դրանցից չորսը կազմակերպվել են ՄԱԿ-ի կենտրոնակայաններում՝ Նյու Յորքում, Ժնևում և Վիեննայում, մեկը՝ Ստամբուլում, մնացածը՝ Բաքվում։ Ադրբեջանը սկսել է ակտիվորեն ֆինանսավորել Ֆրանսիայի և Կորսիկայի անդրծովյան տարածքների տարբեր ներկայացուցիչների։ Ապրիլին էլ Ադրբեջանի Միլլի Մեջլիսի և Խաղաղ օվկիանոսում գտնվող ֆրանսիական Նոր Կալեդոնիայի Կոնգրեսի միջև ստորագրվել էր համագործակցության հուշագիր։ Ֆրանսիայի ներքին գործերի նախարարը Բաքվին մեղադրել էր վերջերս Նոր Կալեդոնիայում տեղի ունեցած անկարգություններին մասնակցության մեջ։