ԱՄՆ զինվորականները Թուրքիայում հարձակման են ենթարկվել․ ՏԵՍԱՆՅՈՒԹ

Թուրք ազգայնական երիտասարդական խմբի ներկայացուցիչներն արևմտյան Իզմիրում հարձակվել են երկու ամերիկացի զինվորների վրա։ Տեղի իշխանությունների հաղորդմամբ՝ միջադեպի առնչությամբ ձերբակալվել է 15 հարձակվող։

Ըստ տեղական լրատվամիջոցների՝ Իզմիրի նահանգապետարանի հայտարարության մեջ ասվում է, որ Թուրքիայի երիտասարդական միության (TGB) անդամները, որոնք ազգայնական ընդդիմադիր Vatan կուսակցության երիտասարդական ճյուղն են, «ֆիզիկական  հարձակում են իրականացրել» քաղաքացիական հագուստով երկու ամերիկացի զինվորների վրա Քոնաք թաղամասում: Միջադեպին միացել են ևս հինգ ամերիկացի զինվորներ, այնուհետև ոստիկանությունն է միջամտել։

Բոլոր 15 հարձակվողները ձերբակալվել են, դեպքի առթիվ հետաքննություն է սկսվել։

Թուրքիայում ԱՄՆ դեսպանատունը հաստատել է հարձակման փաստը:

«Մենք կարող ենք հաստատել տեղեկություններն այն մասին, որ ԱՄՆ զինծառայողները, որոնք բարձրացել են USS Wasp նավ, այսօր Իզմիրում հարձակման զոհ են դարձել։ Նրանք այժմ ապահով են»,- ասվում է դեսպանատան X-ի էջում   գրառման մեջ։

TGB-ն էլ X-ում տեսանյութ է հրապարակել հարձակումից։

«Մեր զինվորների և հազարավոր պաղեստինցիների արյունն իրենց ձեռքերին կրող ամերիկացի զինվորները չեն կարող կեղտոտել մեր երկիրը: Ամեն անգամ, երբ դուք ոտք դնեք այս հողերում, մենք ձեզ կդիմավորենք այնպես, ինչպես դուք արժանի եք»,- հայտարարել է խումբը։

ԱՄՆ ռազմածովային ուժերի նավը, որը տեղակայվել է Միջերկրական ծովում՝ Իսրայելի դեմ հնարավոր սպառնալիքները կանխելու նպատակով, կիրակիից հնգօրյա ժամկետով Թուրքիայի Իզմիր նավահանգստում է։

Սպիտակ տան խոսնակն ասել է, որ Վաշինգտոնը «մտահոգված է» հարձակման կապակցությամբ, սակայն հավելել, որ «երախտապարտ են, որ թուրքական ոստիկանությունը լրջորեն է վերաբերվում այս հարցին և մեղավորներին պատասխանատվության է ենթարկում»: