15.01.2025 | 20:54
Կարսում թուրք-ադրբեջանական զորավարժություններ կանցկացվեն
Վաղեմության հիմքով տարեկան մոտ 1000 գործ է կարճվում․ Քոչարյանի գործով դատավոր Աննա Դանիբեկյան․ ՏԵՍԱՆՅՈՒԹ
Քաղաքականություն
23.08.2024 | 21:00
Ռոբերտ Քոչարյանին վերագրվող ենթադրյալ արարքը տեղի է ունեցել 2008 թվականին, ուստի դժվար է պատկերացնել, թե ինչպես կարող էր այս գործով վաղեմության ժամկետ չանցնել։ Այս մասին Factor TV-ին տված հարցազրույցում ասաց Երևանի քրեական դատարանի նախկին դատավոր Աննա Դանիբեկյանը, որի լիազորությունները մեկ ամիս առաջ Բարձրագույն դատական խորհուրդը դադարեցրել է։
Դատավորի նկատմամբ, հիշեցնենք, կարգապահական վարույթ էր հարուցվել Հայաստանի երկրորդ նախագահ Ռոբերտ Քոչարյանի նկատմամբ քրեական հետապնդումը վաղեմության ժամկետն անցած լինելու հիմքով քրեական հետապնդումը դադարեցնելու որոշումից հետո։
Ի թիվս այլ մեղադրանքների՝ ԲԴԽ-ն իր որոշմամբ դատավոր Աննա Դանիբեկյանին մեղադրում է այն բանում, որ Ռոբերտ Քոչարյանի և Արմեն Գևորգյանի՝ ենթադրյալ կաշառք ստանալու գործը չի առանձնացրել սահմանադրական կարգի տապալման գործից՝ ողջամիտ ժամկետում գործի քննություն իրականացնելու համար։
Դանիբեկյանը, սակայն, համոզված է, որ գործից մաս անջատելու դեպքում երկու գործերի քննությունն է՛լ ավելի երկար էր տևելու, քանի որ նույն դատավարական գործողությունները մեկի փոխարեն երկու անգամ իրականացնելու անհրաժեշտություն էր առաջանալու։
Բացի այդ, Դանիբեկյանի դիտարկմամբ, Քոչարյանին վերագրվող ենթադրյալ կաշառք ստանալու արարքը, ըստ գործի, տեղի է ունեցել 2008 թվականին, հետևաբար, իր համար դժվար է պատկերացնել, թե միայն 2019-ին դատարան ուղարկված գործով ինչպես կարող էր վաղեմության ժամկետ չանցնել։
Հարցազրույցն ամբողջությամբ՝ տեսանյութում։
Արաքս Մամուլյան
