20.07.2026 | 23:24
Հայաստանը կունենա լեզվական պետական քաղաքականության նոր հիմնադրույթներ
Ռուսաստանն ուկրաինական ճակատից զորքեր է տեղափոխում Կուրսկի շրջան․ WSJ
Քաղաքականություն
14.08.2024 | 13:51
Կուրսկի շրջանը դառնում է Ուկրաինայի և Ռուսաստանի զինված դիմակայության նոր օջախ։ Երկու կողմերն էլ այնտեղ ուժեր են քաշում, այդ թվում՝ զորքեր դուրս բերելով ռազմաճակատի այլ հատվածներից, գրում է The Wall Street Journal-ը՝ վկայակոչելով ամերիկացի պաշտոնյաներին։
Ռուսաստանը դուրս է բերում Ուկրաինայից որոշ ստորաբաժանումներ՝ Կուրսկի շրջանում պաշտպանությունն ուժեղացնելու համար։
«Թեև, նրանց խոսքով, ԱՄՆ-ը դեռ փորձում է գնահատել երևույթի մասշտաբները, զորքերի տեղափոխումն առաջին վկայությունն է, որ Մոսկվան ստիպված է եղել վերանայել իր զորքերի տեղակայումն Ուկրաինայի տարածքում»,- գրում է պարբերականը:
Կիևը դեռևս պաշտոնապես չի նշել օպերացիայի նպատակները, սակայն այնտեղ հասկացնում են, որ այն, ի թիվս այլ բաների, ուղղված է թուլացնելու ճնշումը ուկրաինական դիրքերի վրա ճակատի այլ հատվածներում: Խոսքը, առաջին հերթին, Դոնեցկի շրջանի մասին է, որտեղ ռուսական բանակը, ունենալով կենդանի ուժի և տեխնիկայի զգալի առավելություն, մի քանի ամիս շարունակ շարժվում է դեպի պաշտպանական կարևոր կենտրոններ, ինչպիսիք են Պոկրովսկ և Չասով Յար քաղաքները։
Ուկրաինայի ԶՈՒ ներկայացուցիչ, «Տավրիա» զորքերի օպերատիվ-ռազմավարական խմբի խոսնակ Դմիտրի Լիխովսկին Politico-ին ասել է, որ առայժմ խոսքն օկուպացված Զապորոժիեի և Խերսոնի շրջաններից զինվորական անձնակազմի՝ դեպի Կուրսկի շրջան «համեմատաբար փոքր» վերաբաշխման մասին է։ Ուկրաինայի ԶՈՒ Գլխավոր շտաբի աղբյուրը The Economist-ին հայտնել է նաև, որ Խարկովի ռազմաճակատից որոշ ստորաբաժանումներ են տեղափոխվում։
Ուկրաինայի զինված ուժերին ևս անհրաժեշտ է աջակցող ուժեր ուղարկել այնտեղ: Սահմանի մոտ գտնվող WSJ-ի լրագրողները երեքշաբթի տեսել են, թե ինչպես են տանկեր և զրահամեքենաներ մտնում ՌԴ տարածք, մինչդեռ բեռնատարները ծանր տեխնիկայի ուղեկցությամբ գերաններ են տեղափոխել, որոնք օգտագործվում են բունկերներ և խրամատներ կառուցելու համար:
Գերիներով բեռնատարը շարժվել է հակառակ ուղղությամբ․ հաղորդվում է յոթ կամ ութ գերեվարվածի մասին, որոնց աչքերը կապված են եղել կպչուն ժապավենով: Financial Times-ը և CNBC-ը հայտնում են, որ ուկրաինական ստորաբաժանումները գերեվարել են հարյուրավոր ռուս զինվորականների։
Խումբը, որը մտել է Կուրսկի մարզ, ձևավորվել է լավ պատրաստված բրիգադներից և համալրվել է ռազմաճակատի այլ հատվածներից, այդ թվում՝ Դոնեցկի մարզից։
Սա, ինչպես նաև գրոհող խումբը համալրելու անհրաժեշտությունը, որը բախվում է ավելի ու ավելի լուրջ դիմադրության, մտավախություն է առաջացնում, որ Ուկրաինայի զինված ուժերը, հնարավոր է, չկարողանան կարևոր թիրախներ պահել Դոնբասում, որը ռուսական բանակը, դատելով առաջնագծից ստացվող հաղորդագրություններից, շարունակում է գրոհել։
