«Ելք»-ի և «Ծառուկյան» դաշինքի պատգամավորները երաշխավորագրեր են ներկայացրել ՀՀԿ-ական Սամվել Ֆարմանյանի քրոջ համար

ԱԺ «Ելք» խմբակցության պատգամավորներ Արամ Սարգսյանն ու Էդմոն Մարուքյանը, «Ծառուկյան» խմբակցության պատգամավոր Նաիրա Զոհրաբյանը, ԱԺ փոխնախագահ Արփինե Հովհաննիսյանը երաշխավորագրեր են ներկայացրել «Հանրապետական» խմբակցության պատգամովոր Սամվել Ֆարմանյանի քրոջ՝ Անահիտ Ֆարմանյանի ՝ հնարավոր կալանքի որոշան դեպքում դատարան ներկայացնելու համար։

Այս մասին Factor.am-ի հետ զրույցում ասաց պատգամավոր Սամվել Ֆարմանյանը և հավելեց. «Միջնորդությունները այս պահին գտնվում են Անահիտ Ֆարմանյանի փաստաբանների մոտ։ Մինչ այս պահը չի եղել անհրաժեշտություն այդ միջնորդությունը ներկայացնելու համար, հնարավոր է, որ անգամ այդպիսի անհրաժեշտություն չլինի, սակայն, եթե լինի Անահիտ Ֆարմանյանի կալանավորման որոշում, փաստաբանները իրենց ձեռքի տակ եղած այդ միջնորդությունները կներկայացնեն դատարան, կրկնում եմ՝ հնարավոր է, որ դրանք ներկայացնելու անհրաժեշտություն անգամ չլինի»։

Հիշեցնենք, որ հուլիսի 10-ին Անահիտ Ֆարմանյանի նկատմամբ քրեական գործ է հարուցվել Շիրակի Միքայել Նալբանդյանի անվան պետական համալսարանում առերևույթ պաշտոնեական դիրքն օգտագործելով խոշոր և առանձնապես խոշոր չափերով գումարներ յուրացնելու մեղադրանքով։ Իսկ ավելի ուշ հարուցված քրեական գործին արձագանքել է ԱԺ պատգամավորը և շեշտել, որ այն առնչվում է իրեն, որպես Ազգային ժողովի պատգամավոր, և իր քաղաքական գործունեությանը։ Ֆարմանյանի գնահատմամբ՝ դա քաղաքական հետապնդման դասական օրինակ է:

Աղավնի Սուքիասյան