«Պարո՛ն վարչապետ, այն թանգարանը, որը չի վերածվել պահեստի, դուք չեք այցելում». ինչու շարժ չկա. ՏԵՍԱՆՅՈՒԹ

Արա Սարգսյանի և Հակոբ Կոջոյանի տուն-թանգարանում քայլելիս պետք է զգույշ լինել, որպեսզի հատակը հանկարծ չփլվի։ Վերջին անգամ այն վերանորոգվել է 40 տարի առաջ։ Թանգարանի գիպսե քանդակները, օրինակ, անմխիթար վիճակում են, տարիներ շարունակ դրանք ֆոնդերում պահվում են առանց անհրաժեշտ օդափոխության և ջերմաստիճանի։ Դրանց մի մասն էլ տեղ է գտել թանգարանի այգում։

«Քանդակներից շատերը տարիներով մնում են ֆոնդերում և չեն էլ ցուցադրվում, դրանք հատուկ օդափոխության և պահպանման կարիք ունեն, այդ պատճառով էլ մի մասը տեղափոխել ենք այգի, սակայն այստեղ ևս դրանք ապահով պայմաններում չեն»,- նշում է էքսկուրսավար Աիդա Հարությունյանը։

Օրերս ՀՀ վարչապետ Նիկոլ Փաշինյանն այցելել էր Դիլիջանի երկրագիտական թանգարան և, իր խոսքով, շոկի ենթարկվել, որ այդ ճանապարհին նման կառույց կա։ Նա նաև անդրադարձել էր հայաստանյան թանգարանների ընդհանուր վիճակին։

«Մեր թանգարաններում շարժ չկա։ Դրանք, ըստ էության, հիմնականում պահեստ են»,- ասել էր վարչապետը։

Երևանի Ժամանակակից արվեստի թանգարանի գիտական գծով փոխտնօրեն Զառա Այրումյանը, սակայն, հակադարձում է. «Այո, շատ թանգարաններ վերածվել են պահեստների, բայց ես ուզում էի ասել, պարո՛ն վարչապետ, այն թանգարան, որը չի վերածվել պահեստի, դուք չեք այցելում։ Մենք բազմիցս իրեն, կառավարության մյուս անդամներին ուղարկել ենք մեր ցուցահանդեսների հրավերներ, բայց չեն եկել»։

Մանրամասները՝ տեսանյութում։

Աննա Բաբաջանյան