09.04.2026 | 18:21
Ադրբեջանի հետ խաղաղությունը կհանգեցնի հայ-թուրքական սահմանի բացմանը. թուրք պատգամավոր
Ուկրաինան իրավունք ունի հակառակորդին հարվածել ամենուր․ ԵՄ-ն՝ Կուրսկում ռազմական գործողությունների մասին
Քաղաքականություն
08.08.2024 | 18:20
Որպես ինքնապաշտպանության օրինական իրավունքի մաս՝ Ուկրաինան իրավունք ունի հարվածել հակառակորդին՝ «որտեղ անհրաժեշտ համարի, ինչպես իր տարածքում, այնպես էլ հակառակորդի տարածքում»։ Այս մասին ճեպազրույցում հայտարարել է ԵՄ արտաքին քաղաքականության ծառայության ներկայացուցիչ Պետեր Ստանոն, գրում է DW-ի ռուսական ծառայությունը։
Նրա խոսքով՝ ԵՄ-ի դիրքորոշումն այն է, որ Ուկրաինան ենթարկվում է անօրինական ագրեսիայի, հետևաբար, օրինական պաշտպանական պատերազմ է վարում։
«Միջազգային իրավունքի հիման վրա Ուկրաինան ինքնապաշտպանության իրավունք ունի, և այն ներառում է նաև թշնամուն իր տարածքում հարվածներ հասցնելը»,- ասել է Ստանոն՝ պատասխանելով ՌԴ Կուրսկի մարզում Ուկրաինայի զինված ուժերի ռազմական գործողությունների մասին հարցին։
Նա նաև ընդգծել է, որ Ուկրաինայի նկատմամբ Եվրամիության պաշտոնական ռազմավարությունը չի փոխվել այն բանից հետո, երբ Կիևը փոխել է ռազմավարությունը մարտի դաշտում՝ տեղափոխվելով Ռուսաստանի Դաշնության տարածք։
Այսօր առաջին անգամ Ուկրիանայի իշխանությունները մեկնաբանել են մարտերը Կուրսկի մարզում։ Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը հայտարարել է, որ գործողությունների պատճառը ՌԴ-ի ագրեսիան է։
