14.01.2026 | 16:22
Ադրբեջանում պահվող 4 հայեր վերադարձվել են Հակարիի կամրջով
Գտի՛ր 3 տարբերություն․ Երևանյան լճի նախագիծն ու իրականությունը. ՏԵՍԱՆՅՈՒԹ
Քաղաքականություն
08.08.2024 | 19:45
Ավելի քան երկու տարի տևած աշխատանքներից հետո Երևանի քաղաքապետարանն ավարտել է Երևանյան լճի աջակողմյան առափնյա հատվածի բարեկարգումը։ Factor TV-ն քաղաքապետարանից ստացել է բարեկարգման աշխատանքների կատարման ծավալաթերթ-նախահաշիվը, և պարզել, որ կան որոշ անհամապատասխանություններ իրականացված աշխատանքի և գնման պայմանագրում առկա տարբերակի միջև։
Այսպիսով, ըստ պայմանագրի՝ լճի աջ հատվածում պետք է տեղադրվեր մոդուլային հասարակական զուգարան, սակայն տեղում քարե շինություն է, որի պատերն արդեն մի քանի տեղից ճաքած են։ Մոդուլային հասարակական զուգարանի ձեռքբերման և տեղադրման համար հատկացվել էր 2 մլն 657 հազար դրամ։ Մուտքի ավտոմատացված արգելապատնեշի համար հատկացվել է 398 հազար դրամ, սակայն ներկա պահին այն չի աշխատում։
Այս տարվա սկզբին էլ անդրադարձել էինք հեծանվային կայանատեղի տեղադրմանը, որի համար ծախսվել էր 797 հազար դրամ, այնինչ Factor TV-ն պարզել էր, որ այս տեսակի կայանատեղի կարելի էր ձեռք բերել 10 անգամ ավելի ցածր գնով։
Երևանի ավագանու «Ազգային առաջընթաց» խմբակցության անդամ Արամ Թորոսյանի խոսքով՝ Երևանյան լճի աջ ափին առաջին փուլով իրականացված աշխատանքներն ամբողջությամբ թերի են իրականացվել, որն ավագանու ընդդիմադիր անդամը կապում է Շինարարության և բարեկարգման վարչության նախկին պետի աշխատանքի հետ։ Նրա կարծիքով՝ Երևանյան լճի բարեկարգման նախագծերի հետ կապված չպետք է լիներ հատվածային մոտեցում։
Չնայած տարածքը բարեկարգված է, արված աշխատանքները մի շարք հարցեր են առաջացնում։ Օրինակ, ինչո՞ւ է մուտքի ավտոմատացված արգելափակոցը կոտրված, լճի մակերեսին աղբ, ջրի որոշ հատվածներ կանաչած ու մամռակալած, իսկ ոռոգման ցանցի խողովակները, հողի տակով անցնելու փոխարեն, անցնում են թփերի և ծառերի արանքով։ Քաղաքապետարանը վերջերս հայտնել էր՝ այստեղ 130 ծառ և ավելի քան 2000 թուփ է տնկվել։
Տիգրան Ավինյանը դեռ մեկ տարի առաջ քարոզարշավի ժամանակ էր խոստանում երկու տարվա մեջ ավարտել Երևանյան լճի ձախակողմյան առափնյա տարածքի բարեկարգումը։ Քաղաքապետ ընտրվելուց և այս խոստումից մեկ տարի անց այդ հատվածում աշխատանքները նույնիսկ սկսված չեն։ Քաղաքապետարանից հայտնում են՝ այս պահին բարեկարգման աշխատանքների հստակ ժամանակացույց նշել չեն կարող։
Մանրամասները՝ տեսանյութում։
Անի Թամրազյան
