07.10.2026 | 23:48
Արթուր Դանիելյանը կալանավորվեց
Գերմանիայում հյուրանոցի փլուզման հետևանքով զոհեր կան
Քաղաքականություն
07.08.2024 | 17:11
Գերմանիայում երկու մարդ է զոհվել Տրաբեն-Տրաբախի (Հռենլանդ-Պֆալց) մոտ գտնվող Կրյոֆ գյուղում հյուրանոցի մասնակի փլուզման հետևանքով, գրում է DW-ի ռուսական ծառայությունը։
Առաջին տուժածներին հաջողվել է դուրս հանել փլատակների տակից, հայտնել է տեղի ոստիկանությունը։ Նախնական տեղեկություններով՝ փլատակների տակ 8 մարդ կա, նրանց մի մասը ծանր վնասվածքներ է ստացել։ Փրկվածների թվում երեխա կա։
Փրկարարները կապ են հաստատել երեխայի և մյուս հինգ տուժածների հետ։ Ոստիկանությունը փրկարարական գործողությունն անվանել է «չափազանց դժվար», քանի որ կիսով չափ փլուզված շենք պետք է մտնել մեծ զգուշությամբ: Մահացածների մարմինը նույնպես դեռևս չի հաջողվել հանել փլատակների տակից։
Տեղում աշխատում են արտակարգ ծառայությունների շուրջ 250 աշխատակից, այդ թվում՝ տեխնիկական աջակցության աշխատողներ, հրշեջներ, ոստիկաններ և բուժաշխատողներ, ինչպես նաև փրկարար շներ: Միջադեպի վայրն ուսումնասիրվում է, այդ թվում՝ անօդաչու սարքերի կիրառմամբ։
Երեկ ուշ երեկոյան տեղի ունեցած ողբերգության պահին շենքում եղել է 14 մարդ, որոնցից հինգը չեն տուժել և կարողացել են լքել շենքը։ Փլուզումից հետո հարևան տներից տարհանվել է 31 մարդ։ Ողբերգության պատճառները դեռևս պարզ չեն։
