Հասարակություն
07.08.2024 | 11:35
Պարեկային ծառայողների կողմից բռնության ենթարկված Արամ Երիցյանը, որին կալանավորելու միջնորդությունը դատարանը 3 օր առաջ մերժել էր, կրկին ձերբակալվել է։ Տեղեկությունը Factor TV-ի հետ զրույցում հաստատեց նրա պաշտպան Ռաֆայել Ջհանգիրյանը.
«Այսօր առավոտյան ժամը 08:00-ին են ձերբակալել՝ նոր հիմքով կալանքի տանելու համար. նույն քրեական վարույթի շրջանակներում, սակայն այլ հիմքով։ Ամեն գնով ձգտում են անազատության մեջ պահել Արամ Երիցյանին»,- նշեց Ջհանգիրյանը։
Հիշեցնենք՝ օրեր առաջ եղբորը դաժանորեն ծեծի ենթարկելու մասին ահազանգել էր փաստաբան Ռոման Երիցյանը։ Նրա փոխանցմամբ՝ ավտոմեքենան սխալ տեղում կայանելու համար միջադեպ է տեղի ունեցել Պարեկային ծառայության աշխատակիցների և եղբոր միջև։ Քննչական կոմիտեի և Երիցյանի կողմից հրապարակված տեսանյութերում, որոնք պարեկային ծառայողին ամրակցված տեսագրող սարքից են վերցված, երևում է, թե ինչպես են պարեկները փորձում ձեռնաշղթաներ հագցնել և բերման ենթարկել Արամ Երիցյանի, սակայն վերջինս ընդդիմանում է ձեռնաշղթաներ հագցնելուն, նշելով, որ առանց դրանց կգա բաժին։ Տեղի է ունենում քաշքշուկ, ինչից հետո պարեկային ծառայողները գետնին են տապալում Երիցյանին և մոտ տարածությունից արցունքաբեր գազ կիրառում։
Այսօր Երիցյանը երկու քրեական վարույթներով տարբեր կարգավիճակներ ունի՝ տուժողի և մեղադրյալի։ Նրան մեղադրանք է առաջադրվել պարեկային ծառայողների նկատմամբ բռնություն կիրառելու կասկածանքով, իսկ տուժող է ճանաչվել ծառայողների կողմից բռնության ենթարկվելու մասով նախաձեռնված քրեական վարույթի շրջանակներում։
Արամ Երիցյանը ձերբակալված է եղել շուրջ 4 օր, ինչից հետո նախաքննական մարմինը կալանքի միջնորդություն է ներկայացրել դատարան, որը դատավոր Նելլի Բաղդասարյանը մերժել է, արձանագրելով նաև, որ ձերբակալությունը ոչ իրավաչափ է եղել.
«Դատարանը որոշման հիմքում նշել է, որ Երիցյանն ազատության մեջ մնալով գործի ընթացքին չի խոչընդոտի։ Այսօրվա ձերբակալությունը, սակայն ցույց տվեց, որ իրենք ուզում են կալանք տալ Արամին»,- նշեց փաստաբան Ջհանգիրյանը։
Արամ Երիցյանն անազատության մեջ կարող է մնալ մինչև այսօր երեկոյան 20:00-ն, ինչից հետո կամ ազատ կարձակվի կամ կալանքի միջնորդություն կներկայացվի դատարան։
Ռոզա Վարդանյան
