Քաղաքականություն
06.08.2024 | 23:30
Ադրբեջանում կալանավորված բանկիր Ջահանգիր Հաջիևի կինը համաձայնել է Մեծ Բրիտանիայի Նայթսբրիջում շուրջ 14 մլն ֆունտ արժողությամբ տունը և Ասքոթում գոլֆի ակումբը բռնագրավելու որոշմանը։ Այս որոշումն ընդունվել է Հանցագործության դեմ պայքարի ազգային գործակալության (NCA) գույքի ձեռքբերման հետաքննության արդյունքում, գրում են ադրբեջանական լրատվամիջոցները։
NCA-ն կարծում է, որ ակտիվները ձեռք են բերվել խոշոր չափերի խարդախության և հափշտակության, կեղծ հաշվետվությունների և փողերի լվացման միջոցով, ասվում է գործակալության հայտարարության մեջ։
2018 թվականին NCA-ը կալանք էր դրել Հաջիևի անշարժ գույքի վրա Մեծ Բրիտանիայում, որպեսզի դրանք չվաճառվեն կամ փոխանցվեն որևէ մեկին։
Ջահանգիր Հաջիևը մինչև 2015 թվականի մարտը եղել է Ադրբեջանի միջազգային բանկի (IBA) խորհրդի նախագահը։ Հաջորդ տարի նա Ադրբեջանի դատարանի կողմից դատապարտվել է յուրացումների, պաշտոնեական դիրքի չարաշահման, խարդախության և յուրացման համար: 2019-ին նա նաև դատապարտվել է IBA-ի մոսկովյան մասնաճյուղում յուրացումների համար և այժմ 16 տարվա ազատազրկում է կրում Բաքվում։
NCA-ի քննիչները հայտնաբերել են բազմաթիվ օրինակներ, թե ինչպես են բանկից միջոցներ փոխանցվում տարբեր հաշիվներին և լվացվում Հաջիևի մերձավոր գործընկերոջ կողմից: Զգալի գումարներ են փոխանցվել Բրիտանական Վիրջինյան կղզիների, Սենթ Քիթս և Նևիսի, Պանամայի, Կիպրոսի և Լյուքսեմբուրգի միջոցով և օգտագործվել Լոնդոնում գույք ձեռք բերելու համար։
Գոլֆի ակումբի գնումն իրականացվել է Լյուքսեմբուրգում գրանցված ընկերությունների բարդ կառուցվածքի, ինչպես նաև Կիպրոսի օֆշորների միջոցով։
Ենթադրվում է, որ գրեթե բոլոր միջոցները, որոնք օգտագործվել են Նայթսբրիջում տան գնման համար, ստացվել են IBA-ի երկու հատուկ հաշիվներից Կիպրոսի, Էստոնիայի և Շվեյցարիայի միջոցով:
Լոնդոնում երկար տարիներ բնակվող Հաջիևի կինը՝ Զամիրա Հաջիևան, լրատվամիջոցների ուշադրության կենտրոնում է հայտնվել այն բանից հետո, երբ հայտնի էր դարձել, որ 2006-2016 թվականներին ավելի քան 16 մլն ֆունտ (21,3 միլիոն դոլար) է ծախսել Լոնդոնի Harrods առևտրի կենտրոնում։ Երբ 2018 թվականի փետրվարին սկսվել է դատավարությունը, նրա անվամբ բոլոր գույքերը գնահատվում էին ավելի քան 22 միլիոն ֆունտ սթերլինգ (29,2 միլիոն դոլար):
