Արտաշատի քաղաքապետի օգնականը կալանավորվել է, նրան  մեղադրանք է ներկայացվել

Արտաշատի համայնքապետարանի պաշտոնատար անձին մեղադրանք է ներկայացվել առանձնապես խոշոր չափերով խարդախություն կատարելուն օժանդակելու և առանձնապես խոշոր չափերով գույքային վնաս պատճառելով զուգորդված պաշտոնեական լիազորությունները չարաշահելու համար։ Այս մասին  Factor.am-ին հայտնեց Հակակոռուպցիոն կոմիտեի մամուլի խոսնակ Մարինա Օհանջանյանը։

Նրա փոխանցմամբ՝ Հակակոռուպցիոն կոմիտեի քննիչի կողմից միջնորդություն է ներկայացվել դատարան` նրա նկատմամբ կալանքը որպես խափանման միջոց ընտրելու համար, որը բավարարվել է։ 

Factor.am-ի տեղեկություններով՝ կալանավորվածն Արտաշատի քաղաքապետ «Քաղաքացիական պայմանագիր» կուսակցության անդամ Կառլեն Մկրտչյանի օգնականն է։

Հիշեցնենք՝ հուլիսի 30-ին, Հակակոռուպցիոն կոմիտեն ստուգումներ էր իրականացրել Արտաշատի համայնքապետարանում, որի արդյունքում  հանրային քրեական հետապնդում էր հարուցվել 9 անձի նկատմամբ, որից 5-ի նկատմամբ որպես խափանման միջոց էր կիրառվել կալանքը։ 

Նրանք մեղադրվում են առանձնապես խոշոր չափերով կաշառք ստանալու, կաշառք տալու, ինչպես նաև առանձնապես խոշոր չափերով խարդախություն կատարելու համար։ Գործն առնչվում է Արտաշատ քաղաքում շինարարական աշխատանքների ընթացքում կատարված առևերույթ հափշտակություններին։

Factor.am-ն ուսումնասիրել էր, թե որ ընկերություններն են հաղթող ճանաչվել Արտաշատ խոշորացված համայնքում ասֆալտապատման մրցույթում և շինաշխատանքներ են իրականացնում։ Արտաշատ խոշորացված համայնքի Արտաշատ քաղաքի և հարակից 29 բնակավայրերի փողոցների նորոգման և ասֆալտապատման աշխատանքները մեկնարկել են անցած տարի և շարանուկվում են մինչ օրս։

Պարզել էինք, որ Արտաշատում ասֆալտապատման և շինաշխատանքների համար հայտարարված մրցույթում հաղթող ճանաչված ընկերություններից մեկն «Ավետիս խեցի» ՍՊԸ-ն։ Ըստ իրավաբանական անձանց պետական ռեգիստրի՝ (e-register) «Ավետիս խեցի» ՍՊԸ-ն հիմնադրվել է անցած տարի, ընկերության շահառուներն են Աշոտ Ավետիսյանը և Նարեկ Հովհաննիսյանը։ Աշոտ Ավետիսյանը գրանցված է Արտաշատ խոշորացված համայնքի Բերքանուշ բնակավայրում, որտեղ ևս, ըստ ծրագրի,  կատարվում են  ասֆալտապատման աշխատանքներ։ Աշոտ Ավետիսյանը Բերքանուշի վարչական ղեավար Հայկ Ավետիսյանի հայրն է։

«Ավետիս խեցի» ընկերությունը խեցեգործությամբ է զբաղվում և արտադրանքը ներկայացված է ֆեյսբուքյան էջում։

Արտաշատի համայնքապետարանից ստացված տվյալների համաձայն՝ Մրգաշեն և Վարդաշեն բնակավայրերի փողոցների ասֆալտապատման մրցույթում էլ հաղթող է ճանաչվել «ԲԵՐՄԱ» ՓԲԸ-ն։ Ըստ իրավաբանական անձանց պետական ռեգիստրի՝ (e-register) այս ընկերության իրական շահառուներն են Ավետիք Մանուկյանը և Արա Մովսիսյանը։ Տնօրենը Ավետիք Մանուկյանն է, իսկ ընկերությունը գրանցված է Մասիս խոշորացված համայնքում։

Մանյա Պողոսյան