06.06.2026 | 12:25
Էլինա Ավանեսյանը կիսաեզրափակիչ է դուրս եկել Խորվաթիայում
ՄԱԿ-ը զգուշացնում է՝ զերծ մնալ Մերձավոր Արևելքում մեծ պատերազմից
Քաղաքականություն
01.08.2024 | 22:14
ՄԱԿ-ի գլխավոր քարտուղար Անտոնիո Գուտերեշը քննադատել է իսրայելական բանակի հարձակումը Բեյրութի վրա և Թեհրանում արմատական իսլամիստական ՀԱՄԱՍ շարժման առաջնորդ Իսմայիլ Հանիեի սպանությունը, փոխանցում է DW-ի ռուսական ծառայությունը։
«Հարավային Բեյրութում և Թեհրանում հարձակումները վկայում են վտանգավոր էսկալացիայի մասին այն ժամանակ, երբ բոլոր ջանքերը պետք է ուղղված լինեն Գազայում հրադադարի հաստատմանը և իսրայելա-լիբանանյան սահմանին հանգստություն հաստատելուն»,- ասել է նրախոսնակ Ստեֆան Դյուժարիկը։
Նրա խոսքով՝ Գուտերեշը կոչ է արել շահագրգիռ կողմերին «եռանդորեն աշխատել տարածաշրջանում լարվածության թուլացման ուղղությամբ՝ բոլորի համար երկարաժամկետ խաղաղություն և կայունություն հաստատելու համար»։
ՄԱԿ-ում Ճապոնիայի մշտական ներկայացուցչի տեղակալ Միցուկո Շինոն կոչ է արել միջազգային ջանքեր գործադրել՝ Մերձավոր Արևելքում խոշոր ռազմական հակամարտությունը կանխելու համար:
«Մենք մտավախություն ունենք, որ տարածաշրջանը գտնվում է համապարփակ պատերազմի շեմին»,- ասել է նա:
Իր հերթին, ՄԱԿ-ում Չինաստանի մշտական ներկայացուցիչ Ֆու Կոնգը կարծում է, որ Գազայում հրադադարի հասնելու անկարողությունն է լարվածության սրման պատճառը։ Ավելի մեծ ազդեցություն ունեցող երկրները պետք է ավելի շատ ճնշում գործադրեն և ավելի եռանդուն աշխատեն Գազայում պատերազմի կրակը մարելու համար, ասել է նա։
ՄԱԿ-ում Մեծ Բրիտանիայի մշտական ներկայացուցիչ Բարբարա Վուդվորդը հանգստության և զսպվածության կոչ է արել՝ կրկնելով Գազայում կրակն անհապաղ դադարեցնելու իր կոչը։ Իսրայելը և ՀԱՄԱՍ-ը պետք է վերականգնեն իրենց հանձնառությունը խաղաղ գործընթացին, որը կհանգեցնի երկու պետությունների լուծմանը՝ ապահով Իսրայելով և ինքնիշխան Պաղեստին պետությունով, ասել է նա:
«Խաղաղության ճանապարհը պետք է լինի դիվանագիտական բանակցությունների միջոցով: Երկարաժամկետ խաղաղությունը չի կարող ապահովվել ռումբերով և փամփուշտներով»,- շեշտել է Վուդվորդը:
