06.09.2026 | 22:03
«Սուրբ Հովհաննես» մատուռ բարձրացող քաղաքացին վնասել է ոտքը․ փրկարարներն օգնել են
40 մլն դոլար վարկային համաձայնագիր՝ էներգետիկ ոլորտի համար
Տնտեսություն
01.08.2024 | 11:11
Կառավարության նիստում չզեկուցվող հարցերի փաթեթում ընդգրկված է Հայաստանի Հանրապետության ու Վերակառուցման և զարգացման միջազգային բանկի միջև «Հայաստանի էներգետիկ անցումն ապահովող ծրագիր» վարկային համաձայնագրի ստորագրման առաջարկությանը հավանություն տալու մասին հարցը։
Ըստ կառավարության ներկայացրած հիմնավորման՝ Հայաստանի և Վերակառուցման և զարգացման միջազգային բանկի միջև նախատեսվում է կնքել «Հայաստանի էներգետիկ անցումն ապահովող ծրագիր» վարկային համաձայնագիր՝ 40 մլն դոլարի չափով։
Նախագծի շրջանակներում նախատեսվում է վերակառուցել «Շահումյան-2», «Մարաշ» և «Եղեգնաձոր» ենթակայանները։
Ենթակայանների վերակառուցման իրականացման նպատակներն են՝ էներգետիկ ենթակառուցվածքների վերազինում, արդիականացում և առաջատար տեխնոլոգիաներով հագեցման աշխատանքների իրականացում, ինչպես նաև սարքավորումների խափանման պատճառով վթարային անջատումների քանակի և վթարների վերացման տևողության նվազեցում՝ բարձրացնելով էներգահամակարգի հուսալիությունը և կայունությունը։
Ենթակայանների վերազինումը և արդիականացումը կնպաստեն էլեկտրաէներգետիկական համակարգի վթարայնության նվազեցմանը, էլեկտրաէներգիայի մատակարարաման հուսալիության բարձրացմանը, ինչպես նաև կկրճատվեն ենթակայանների շահագործման և պահպանման ծախսերը։
Նշենք, որ «Շահումյան-2» 220/110/10 կՎ ենթակայանը կառուցվել է 1964-ին։ Ենթակայանի դրվածքային հզորությունը 250 ՄՎԱ է: «Մարաշ» 220/110/10 կՎ ենթակայանը կառուցվել է 1978-ին: Ենթակայանի դրվածքային հզորությունը 375 ՄՎԱ է:
Իսկ «Եղեգնաձոր» 220/110/35 կՎ ենթակայանը կառուցվել է 1966 -ին: Ենթակայանի դրվածքային հզորությունը 126 ՄՎԱ է:
Ենթակայաններում սարքավորումների զգալի մասը շահագործվում է ավելի քան 40 տարի։
