05.04.2026 | 16:15
Իսրայելը հայտնել է մեկ օրում Իրանում ավելի քան 120 օբյեկտների ուղղությամբ գրոհների մասին
Էրդողանն օգտագործել է ջիհադիստներին ԼՂ-ում իր հանցագործությունն իրականացնելու համար․ Անն Լորանս Պետել
Քաղաքականություն
30.07.2024 | 11:23
Ֆրանսիայի Ազգային ժողովի պատգամավոր, Ֆրանսիա-Հայաստան խորհրդարանական բարեկամության խմբի ղեկավար Անն Լորանս Պետելը X-ում արված գրառմամբ անդրադարձել է Թուրքիայի նախագահ Ռեջեփ Թայիփ Էրդողանի՝ Իսրայելի վրա հարձակվելու հայտարարությանն ու արցախյան 44-օրյա պատերազմին մասնակցության մասին խոստովանությանը։
«Էրդողանը, որը ցանկանում է հարձակվել Իսրայելի վրա, հանդարտորեն բացատրում է, որ դա արդեն արել է Լեռնային Ղարաբաղում։ Եվ նա նույնիսկ օգտագործել է ջիհադիստներին՝ իր հանցագործությունն իրականացնելու համար»,- գրել է ֆրանսիացի պատգամավորը։
Հիշեցնենք, որ Էրդողանն ասել էր՝ պետք է լինեն շատ ուժեղ, որ Իսրայելը չկարողանա «անել այն, ինչ անում է Պաղեստինի հետ»։
«Ինչպես մտանք Ղարաբաղ ու Լիբիա, նույն բանը կանենք նրանց հետ։ Պատճառ չկա չանելու։ Միայն պետք է ուժեղ լինենք։ Մենք այսօր հնարավոր ամեն ինչ անում ենք Իսրայելի դեմ, դադարեցրել ենք նրա հետ առևտուրը, խզել մեր հարաբերությունները»,- հայտարարել էր Էրդողանը։
Ի դեպ, Էրդողանի այս խոստովանությանը պատասխանել էր Ադրբեջանի ՊՆ-ն․ «Ադրբեջանի տարածքային ամբողջականության և ինքնիշխանության վերականգնման հետ կապված ռազմական գործողություններին որևէ երկրի զինվորականների մասնակցության մասին հայտարարությունները որևէ հիմք չունեն»։
