23.06.2026 | 06:00
ԱԱ-2026. Նորվեգիան դուրս եկավ փլեյ-օֆֆ, Հոլանդը դարձյալ դուբլն գրանցեց. ՏԵՍԱՆՅՈՒԹ
Ադրբեջանի ՊՆ-ից արձագանքել են Էրդողանի՝ Արցախի պատերազմին Թուրքիայի մասնակցության մասին հայտարարությանը
Քաղաքականություն
29.07.2024 | 15:47
Բաքվից արձագանքել են Թուրքիայի նախագահ Ռեջեփ Թայիփ Էրդողանի խոստվանությանը, որ թուրքական կողմը մասնակցել է Արցախյան 44-օրյա պատերազմին։ 1news.az-ը Ադրբեջանի պաշտպանության նախարարությունից մեկնաբանություն է խնդրել այս կապակցությամբ։ Գերատեսչության բարձրաստիճան ներկայացուցչի խոսքով՝ «Ադրբեջանի տարածքային ամբողջականության և ինքնիշխանության վերականգնման հետ կապված ռազմական գործողություններին որևէ երկրի զինվորականների մասնակցության մասին հայտարարությունները որևէ հիմք չունեն»։
Ըստ ադրբեջանական կողմի՝ 44-օրյա պատերազմի ժամանակ «Թուրքիան և Պակիստանը քաղաքական աջակցություն են ցուցաբերել Ադրբեջանին»։
Հիշեցնենք՝ Էրդողանը հայտարարել էր, որ պետք է լինեն շատ ուժեղ, որ Իսրայելը չկարողանա «անել այն, ինչ անում է Պաղեստինի հետ»։
«Ինչպես մտանք Ղարաբաղ ու Լիբիա, նույն բանը կանենք նրանց հետ։ Պատճառ չկա չանելու։ Միայն պետք է ուժեղ լինենք։ Մենք այսօր հնարավոր ամեն ինչ անում ենք Իսրայելի դեմ, դադարեցրել ենք նրա հետ առևտուրը, խզել մեր հարաբերությունները»,- հայտարարել էր Էրդողանը։
Հայկական կողմը պատերազմից առաջ ու դրանից հետո տարբեր փաստական ապացույցներ է ներկայացրել Թուրքիայի ԶՈՒ-ի՝ Արցախի դեմ ադրբեջանական ագրեսիային մասնակցության վերաբերյալ։
