Արմեն Քոլոյանը խոսել է Հանրային ռադիոյի տնօրեն ընտրվելու մասին, շրջանցել մեղադրանքները

Այսօր Հանրային ռադիոյի գործադիր տնօրենի մրցույթում հաղթած լրագրող Արմեն Քոլոյանն անդրադարձել է իր նշանակմանը։

Ավելի վաղ Factor.am-ը հայտնել էր, որ Հանրային հեռարձակողի խորհուրդը ռադիոյի գործադիր տնօրեն է ընտրել Արմեն Քոլոյանին։ Նա «Ազատություն» ռադիոկայանի լրագրող է։ Բնակվում և աշխատում է Պրահայում։

Օրվա ընթացքում Factor.am-ի հարցերին պատասխանելուց հրաժարված Քոլոյանը գրավոր անդրադարձով երախտագիտություն է հայտնել Հանրային հեռարձակողի խորհրդի կազմին իրեն վստահելու համար։

«Շնորհակալություն եմ հայտնում մրցույթի մասնակիցներին, հավատալով, որ նրանցից յուրաքանչյուրը ջանացել է ներկայացնել լավագույն
հայեցակարգը: Համոզված եմ, որ նախագծերում կան օգտակար գաղափարներ, որոնք՝ հեղինակների համաձայնության պարագայում, կարող են քննարկվել և ընդգրկվել Հանրայինի աշխատանքային օրակարգում: Մրցույթի մասնակիցներին համարում եմ իմ գործընկերները, որոնք նախևառաջ մտահոգված են Հանրային ռադիոյի ճակատագրով, և հարգանքով եմ վերաբերվում մրցույթի արդյունքների
վերաբերյալ նրանց արտահայտած կամ արտահայտելիք կարծիքներին: Լրացուցիչ պարզաբանումներ և մեկնաբանություններ հնարավոր կլինեն միայն տեղում իրավիճակը մանրամասն վերլուծելուց հետո: Խնդրում եմ ըմբռնումով ընկալել և
ներողամիտ լինել, եթե չեմ արձագանքում հարցազրույցի դիմումներին»,-լրատվամիջոցների համար նախատեսված հաղորդագրությունում նշել է Քոլոյանը։

Նկատենք, որ նա չի անդրադարձել իրեն ուղղված մեղադրանքներին։ Մասնավորապես, նախկին տնօրեն Գարեգին Խումարյանը հայտարարել է, որ Քոլոյանը Հանրային հեռարձակողի խորհրդի նախագահ Արա Շիրինյանի հետ այցելել է կառավարություն, հանդիպել իշխանության ներկայացուցչի հետ, որտեղ էլ որոշվել է մրցույթի ելքը։ Արմեն Քոլոյանն այս մեղադրանքը շրջանցել է, թե՛ իր հայտարարության տեքստում, թե՛ ավելի վաղ Factor.am-ի հետ զրույցում։

Նշենք, որ նախկին տնօրեն Գարեգին Խումարյանը դատարանում վիճարկելու է մրցույթի անցկացման կարգն ու արդյունքերը։

Թեմային Factor.am-ն անդրադարձել ծավալուն ռեպորտաժով։

Նարեկ Կիրակոսյան