09.09.2026 | 11:48
ԱՄՆ-ն հայտնել է իրանական 5 լցանավերի ոչնչացման մասին․ Թեհրանը թիրախավորել է Հորդանանում ամերիկյան ռազմաբազան
Ադրբեջանն ու Չինաստանը ռազմական կրթության ոլորտում համագործակցության հարցեր են քննարկել
Քաղաքականություն
23.07.2024 | 22:43
Ադրբեջանի Պաշտպանության ազգային համալսարանում հանդիպում է տեղի ունեցել Բաքվում այցով գտնվող Չինաստանի Ժողովրդա-ազատագրական բանակի ռազմական գիտությունների ակադեմիայի պատվիրակության հետ։ Այս մասին հայտնում է Ադրբեջանի պաշտպանության նախարարությունը։
Նշվում է, որ հանդիպման ընթացքում քննարկվել են ռազմական կրթության ոլորտում Ադրբեջանի և Չինաստանի միջև համագործակցության զարգացման ներկա վիճակը և հեռանկարները։ «Բարձր է գնահատվել Չինաստանում կազմակերպված դասընթացներին ադրբեջանական բանակի անձնակազմի հաջող մասնակցությունը, և հատկապես ընդգծվել է նման հանդիպումների կարևորությունը հարաբերությունների զարգացման և փորձի փոխանակման համար»,- ասված է հաղորդագրությունում։
Այցի շրջանակներում չինական պատվիրակության անդամներն այցելել են նաև Ռազմական կառավարման ինստիտուտի օտար լեզուների կենտրոն։ Այստեղ քննարկվել են ուսումնական գործընթացում ժամանակակից տեխնոլոգիաների կիրառման հնարավորությունները և ադրբեջանական բանակի զինվորականների համար չինարենի դասավանդման հարցերը։
Հավելենք, որ հունիսի կեսերին էլ այցով Բաքվում էր Չինաստանի Ժողովրդական-ազատագրական բանակի միջազգային ռազմական համագործակցության գլխավոր վարչության պետի տեղակալ, գեներալ-մայոր Յաո Գինի գլխավորած պատվիրակությունը։
