«Չոր նավահանգիստ» ծրագրի իրականացման ճանապարհային քարտեզը գտնվում է վերջնական քննարկման և հաստատման փուլում

Հայաստանն աշխատում է «Չոր նավահանգստի» և արդյունաբերական գոտու կառուցման նախագծի վրա, արդեն իրականացվել է «Շիրակի չոր նավահանգիստ» ծրագրի տեխնիկատնտեսական հիմնավորում, այս մասին Factor.am-ի գրավոր հարցմանն ի պատասխան տեղեկացրել են ՀՀ էկոնոմիկայի նախարարությունից։

Գերատեսչությունից հայտնել են, որ ծրագրի իրագործումն ապահովելու նպատակով մշակվել է ծրագրի իրականացման ճանապարհային քարտեզը, որն այժմ գտնվում է վերջնական քննարկման և հաստատման փուլում։

Factor.am-ը նաև հետաքրքրվել էր՝ արդյո՞ք Երևանը բանակցություններ է վարում «Չոր նավահանգիստ» նախագծի օպերատոր ընտրելու հարցում, եթե այո, ապա ո՞ր ընկերությունների հետ։

Այս հարցերին նախարարությունից պատասխանել են, որ ծրագրի վերաբերյալ մանրամասները կհստակեցվեն ճանապարհային քարտեզի վերջնական հաստատումից հետո։

Հիշեցնենք՝ դեռ հունվարին էկոնոմիկայի նախկին նախարար Վահան Քերոբյանը հայտարարել էր, որ մինչև տարվա ավարտը ցանկություն կա «Չոր նավահանգիստ» նախագծի և Գյումրիում ինդուստրիալ պարկ կառուցելու համար օպերատոր ընտրել։

Ծրագրի իրականացումով, ըստ էկոնոմիկայի նախարարության, Գյումրիում կստեղծվեն լոգիստիկ կենտրոն, արդյունաբերական գոտի, ազատ տնտեսական գոտի, պահեստային տարածքներ։ Դա թույլ կտա ապրանքներ և բեռներ տեղափոխել ցանկացած ուղղությամբ` օգտագործելով ինչպես օդային, այնպես էլ երկաթուղային տրանսպորտը։

Նախագիծը նախատեսում է արդյունաբերական պարկի ստեղծում, արդյունքում՝ նոր աշխատատեղերի ստեղծում, տրանսպորտային համակարգի բարելավում։

Հավելենք, որ «Չոր նավահանգիստ» հասկացությունը լայն տարածում ունի ամբողջ աշխարհում և հատկապես արդիական է դեպի ծով ելք չունեցող երկրների համար, ինչպիսին է Հայաստանը։ «Չոր նավահանգիստը» ֆունկցիոնալ առումով գրեթե ոչնչով չի տարբերվում ծովայինից, պարզապես նավերի փոխարեն օգտագործվում են երկաթուղային վագոններ և բեռնատարներ։

Մանյա Պողոսյան