14.01.2026 | 13:18
Հայաստան-Թուրքիա հարաբերություններում իրադարձություններ են տեղի ունենալու․ Փաշինյան․ ՏԵՍԱՆՅՈՒԹ
Ալիևին քննադատող ադրբեջանցի լրագրողին Վրաստանում թույլ չեն տվել մեկնել Թուրքիա
Հասարակություն
19.07.2024 | 16:38
Վրաստանում բնակվող ադրբեջանական Azel.TV կայքի ղեկավար Աֆղան Սադիգովին Թբիլիսիի օդանավակայանում թույլ չեն տվել Անկարա թռչել։ Նրան ձերբակալել են սահմանային և անձնագրային հսկողության կետում և հետ են վերադարձրել։ Այս մասին ադրբեջանական լրատվամիջոցներին պատմել է Սադիգովը։
Սադիգովի խոսքով՝ իրեն ասել են, որ բացի Ադրբեջանից, այլ երկիր գնալ չի կարող։
«Ինձ չեն ասել, թե ով է երրորդ երկրներ մուտքի արգելքը դրել։ Ինձ առաջարկեցին պարզաբանումներ խնդրել Վրաստանի ՆԳՆ-ից»,- նշել է նա՝ ասելով, որ արգելքը Բաքվից է՝ իշխանություններին ու նախագահ Իլհամ Ալիևին ուղղված իր քննադատությունների պատճառով։
«Դա պայմանավորված է վերջերս իմ քննադատական գրառումներով և տեսանյութերով: Ներկա պահին իմ դեմ քրեական գործեր չկան, բայց գիտեմ, որ հենց վերադառնամ Ադրբեջան, ինձ էլ կձերբակալեն քննադատող մյուս լրագրողների նման։ Ինձ սպառնացել են Վրաստանում, իմ հարազատներին Ադրբեջանում՝ պահանջելով, որ դադարեցնեմ քննադատությունները։ Դրա համար էլ մենք ցանկանում ենք հեռանալ Վրաստանից»,- ասել է լրագրողը։
Նա Վրաստանում է ապրում անցյալ տարվա դեկտեմբերի 24-ից։ Սադիգովը բուժման նպատակով գնացել է Վրաստան, սակայն սպառնալիքների պատճառով չի վերադարձել Ադրբեջան։
Նա նախկինում կալանավորվել է 2020 թվականի մայիսին՝ շորթման մեղադրանքով։ 2020 թվականի նոյեմբերի 3-ին դատարանը նրան դատապարտել է յոթ տարվա ազատազրկման։ Վերաքննիչ դատարանը պատիժը կրճատել է 6 տարի, իսկ Գերագույն դատարանը՝ 4 տարի։ 2022թ-ի մայիսին նրան ներում է շնորհվել։ Տեղական իրավապաշտպանները նրան ճանաչել են քաղբանտարկյալ։
Էմմա Չոբանյան
