Թուրքիան արձագանքել է Կիպրոսի վերաբերյալ Հունաստանի ՊՆ ղեկավարի հայտարարություններին

Թուրքիան արձագանքել է Հունաստանի պաշտպանության նախարար Նիկոս Դենդիասի՝ երկուշաբթի Կիպրոս կատարած այցի ժամանակ 1974 թվականի հեղաշրջման 50-ամյակին նվիրված հայտարարություններին: Թուրքական լրատվամիջոցների հաղորդմամբ՝ երկրի ՊՆ-ն խստորեն դատապարտել է Դենդիասի հայտարարությունը կիպրոսցի թուրքերի և թուրքական բանակի մասին։ Նախարարությունը Դենդիասի հայտարարությունն անվանել է «ցածր, ստերով ու զրպարտություններով լի՝ ուղղված կիպրոսցի թուրքերի և թուրքական բանակի դեմ»։

Նշվում է, թե որ «թուրքական բանակը քայլեր է ձեռնարկել՝ համաձայն Թուրքիայի երաշխիքային իրավունքի, որը բխում է միջազգային համաձայնագրերից և 1963-1974 թվականներին կիպրոսցի թուրքերին փրկել է ցեղասպանության փորձից», որոնք, իբր, ենթարկվել են հունական կողմից ամեն տեսակի ճնշումների 1963-1974 թվականներին։

«Թուրք զինվորականների խիզախության և ներկայության շնորհիվ 1974 թվականից Կիպրոսում արյունահեղություն չի եղել, հունական խունտայի ճնշումը դադարեցվել է, Հունաստանում ռազմական ռեժիմը փլուզվել է և վերադարձը ժողովրդավարությանը հնարավոր է դարձել։ Թուրք զինվորականները վաղն էլ կշարունակեն մնալ Կիպրոսի խաղաղության և հանգստության երաշխավորը, ինչպես երեկ և այսօր։ Կոչ ենք անում Հունաստանի պաշտպանության նախարարին՝ դադարեցնել երկու երկրների ղեկավարների կողմից առաջ քաշված ընդհանուր դիրքորոշումը խաթարելու փորձերը, որն ուղղված է Թուրքիայի և Հունաստանի միջև հարաբերությունների կառուցողական զարգացմանը։ Պարոն Դենդիասի՝ թուրք և հույն ժողովուրդների միջև տարաձայնություններ սերմանելով քաղաքական կարիերա անելու փորձերն արդյունք չեն տա»,-ասվում է հայտարարության մեջ։

Նիկոսիայում իր կիպրացի գործընկեր Վասիլիս Պալմասի հետ հանդիպումից հետո Դենդիասն ասել էր, որ 1974 թվականի հեղաշրջումը «բացել է թաքնված հարձակվողի համար հետևի դուռը»: Նա նաև կոչ էր արել «արդար և կենսունակ լուծում» տալ Կիպրոսի խնդրին՝ համաձայն ՄԱԿ-ի Անվտանգության խորհրդի բանաձևերի, որոնք կոչ են անում ստեղծել երկհամայնքային դաշնություն:

«Անընդունելի է, որ եվրոպական մայրաքաղաքը, ԵՄ անդամ երկրի մայրաքաղաքը, ՄԱԿ-ի անդամ պետությունը պետք է կիսվի կես դարով, ունենա կանաչ կամ այլ գունավոր գծեր։ Իհարկե, անընդունելի է, որ վերջին 50 տարիների ընթացքում խախտվել է միջազգային իրավունքը և ՄԱԿ-ի կանոնադրությունը»,- հայտարարել է Նիկոս Դենդիասը։

Էմմա Չոբանյան