01.11.2024 | 13:31
Թուրքական զենքը սպանում է ռուսներին․ Լավրովը՝ Անկարայի ու Կիևի ռազմական համագործակցությունը «տարակուսելի» է անվանել
ԱՄՆ Պետքարտուղարության պաշտոնյաները քննարկել են Ադրբեջանում կրոնական ազատության խնդիրները
Քաղաքականություն
12.07.2024 | 21:43
Ադրբեջանում ԱՄՆ դեսպանատանը փաստաբաններ Բահրուզ Բայրամովը և Ջավադ Ջավադովը հանդիպել են Բաքվում այցով գտնվող Պետքարտուղարության միջազգային կրոնական ազատությունների գրասենյակի փոխտնօրեն Ջեյսոն Միչիներնին։ Հանդիպում է եղել նաև Պետքարտուղարության քաղաքականության դեպարտամենտի պաշտոնյա Սոնյա Ֆերնանդեսի և ԱՄՆ դեսպանատան քաղաքական հարցերով նոր խորհրդական Դիանա Բրաունի հետ։
Քննարկվել են Ադրբեջանում դավանանքի ազատության և հավատացյալների ձերբակալության հարցերը։ Փաստաբան Ջավադ Ջավադովն ադրբեջանական լրատվամիջոցներին ասել է, որ հանդիպումը տևել է ավելի քան մեկ ժամ։
«Պետքարտուղարության պաշտոնյաները հարցեր ուղղեցին Ադրբեջանում կրոնական անձանց ձերբակալությունների, հատկապես՝ զանգվածային ձերբակալությունների մասին թմրանյութերի, իսկ որոշների դեպքում՝ դավաճանության մեղադրանքով: Ընդհանուր առմամբ, մտքերի փոխանակում է տեղի ունեցել երկրում կրոնական ազատության ներկա վիճակի, 2015 թվականից սկսած օրենսդրությունում կրոնական ազատության սահմանափակող դրույթների ներդրման շուրջ»,- ասել է նա։
Նշենք, որ 2023 թվականի ԱՄՆ Պետքարտուղարության հրապարակած զեկույցում Ադրբեջանը ներառվել է հատուկ ցանկում՝ որպես կրոնական ազատությունը լրջորեն ոտնահարող երկիր, այդ թվում՝ Արցախի նկատմամբ վերահսկողություն հաստատելուց հետո կրոնական ազատության լուրջ խախտումներում ներգրավված լինելու համար։
Պետքարտուղարությունն այս որոշումը կայացելիս հետևել է Կրոնական ազատության հարցերով ԱՄՆ հանձնաժողովի՝ USCIRF-ի առաջարկությանը, որը մտահոգություն էր հայտնել Լեռնային Ղարաբաղում քրիստոնեական վայրերի ճակատագրի հետ կապված՝ սեպտեմբերին ԼՂ-ն Ադրբեջանի վերահսկողությանն անցնելուց հետո, ինչի հետևանքով Արցախի հայերը բռնի տեղահանվել են։
USCIRF-ը նաև մտահոգություն էր հայտնել կրոնական ակտիվիստների նկատմամբ բռնաճնշումների վերաբերյալ: Իրավապաշտպաններն ահազանգում են Ադրբեջանում կրոնական ակտիվիստների նկատմամբ իրավունքների խախտումների մասին։
Հավելենք, որ «Ադրբեջանի քաղբանտարկյալների ազատության միությունը» հունիսին հրապարակել էր երկրում քաղբանտարկյալների նոր ցուցակը, որում ներառված է 303 մարդ, որից 216-ը հավատացյալներ են։
Էմմա Չոբանյան
