Քաղաքականություն
09.07.2024 | 17:23
Փարիզի դատախազությունը հետաքննություն է սկսել Ֆրանսիայի Ազգային ժողովի ծայրահեղ աջ «Ազգային միասնություն» կուսակցության խորհրդարանական խմբակցության ղեկավար Մարին Լը Պենի նկատմամբ։ Այս մասին հայտնում է BFMTV-ն՝ հղում անելով իր աղբյուրներին։
Լրատվամիջոցի տեղեկություններով՝ հետաքննությունը սկսվել է 2022 թվականին Լը Պենի նախագահական արշավի անօրինական ֆինանսավորման կասկածների պատճառով։
Դատախազությունն այս որոշումը կայացրել է այն բանից հետո, երբ 2023 թվականի ապրիլին Քարոզարշավի հաշիվների և քաղաքական ֆինանսավորման ազգային հանձնաժողովը (CNCCFP) զեկույց է պատրաստել նախագահական ընտրություններում Լը Պենի նախընտրական արշավի վերաբերյալ։ Հետաքննությունը սկսվել է վերջերս։
Ֆրանսիայում նախընտրական քարոզարշավի ժամանակ թեկնածուներին արգելվում է գերազանցել ծախսերի սահմանված շեմը, և եթե այդ պայմանը կատարվում է, պետությունը փոխհատուցում է նրանց քարոզարշավի ծախսերի մի մասը։ Եթե թեկնածուները չեն համապատասխանում, CNCCFP-ն կարող է փոփոխել ընտրական հաշիվները, նվազեցնել հատկացված փոխհատուցման գումարը և, անհրաժեշտության դեպքում, հարցը փոխանցել հետաքննության:
Լրատվամիջոցի տվյալներով՝ Մարին Լը Պենը միակը չէ, ում դեմ CNCCFP-ն բողոք է ներկայացրել դատախազություն, սակայն միայն նրա նկատմամբ է հետաքննություն սկսվել։
