07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Ադրբեջանից առաջ ենք,Վրաստանից՝ հետ. բուհերն ու լավագույն 500-յակում հայտնվելու շանսերը․ ՏԵՍԱՆՅՈՒԹ
Հասարակություն
09.07.2024 | 19:45
Հայաստանի առնվազն 4 բուհ պետք է ընդգրկված լինի միջազգային վարկանշային աղյուսակների լավագույն 500-յակում․ այսպիսի խնդիր է դրված ՀՀ Կրթության՝ մինչև 2030 թվականի ռազմավարության մեջ։
QS World University Ranking-ի՝ այս տարվա հունիսին հրապարակած տվյալների համաձայն՝ աղյուսակում հայկական բուհերից հայտնվել է միայն Երևանի պետական համալսարանը, այն էլ՝ զբաղեցնելով 901-950-րդ տեղը: ԵՊՀ միջազգային համագործակցության վարչության պետ Ալեքսանդր Մարգարովը նշում է՝ իրենք նպատակ էին դրել հայտնվել լավագույն 1000 բուհերի ցուցակում։ Դա ստացվել է, հիմա էլ ձգտում են հայտնվել լավագույն 750-ի շարքում:
«Եթե հաշվի առնենք, որ արտասահմանցի ուսանողների, դասախոսների, հետազոտողների թիվը բուհում մեծացել է, շատացել են հրապարակված հոդվածները, կարելի է ակնկալել, որ 3 տարվա կտրվածքով ԵՊՀ-ն ավելի կբարելավի դիրքերը, մենք նպատակադրվել ենք ներառվել լավագույն 750 բուհերի ցանկում»,-ասում է Ալեքսանդր Մարգարովը։
Տարածաշրջանում, օրինակ, Թուրքիայից QS-ի վարկանիշային աղյուսակում հայտնվել է Միջին Արևելքի տեխնիկական համալսարանը, որը 285-րդն է, իսկ Ստամբուլի տեխնիկական համալսարանը 326-րդն է, Իրանից Թեհրանի համալսարանը 368-րդն է, Շարիֆ տեխնոլոգիական համալսարանը՝ 342-րդը:
Հարևան երկրներից Մայր բուհին դիրքով զիջում է Բաքվի պետական համալսարանը, որը 951-1000-րդ տեղում է: Իսկ, օրինակ, Ադրբեջանի տնտեսագիտական համալսարանը 1001-1200-րդ հորիզոնականում է: Վրաստանից այս տարվա աղյուսակում հայտնվել է երկու բուհ՝ Թբիլիսիի պետական համալսարանը, որն ավելի բարվոք դիրքում է, քան ԵՊՀ-ն․ այն զբաղեցնում է 791-800-րդ տեղը, ինչպես նաև Վրաստանի տեխնիկական համալսարանը, որ 901-950-րդ հորիզոնականում է:
Իսկ ինչի՞ հաշվին է հարևան Վրաստանն ավելի լավ դիրքեր գրավել վարկանիշային աղյուսակում:
«Մինչև հիմա մենք Հայաստանում չունենք մեր իսկ հետազոտություններին վերաբերող հրապարակումները (առանց համահեղինակների) միջազգային հեղինակավոր պարբերականներում, մինչդեռ աշխարհին հետաքրքիր է՝ բուհը, որպես կառույց, որը պետք է ունենա հետազոտական թիմ, կարո՞ղ է, արդյոք, նախաձեռնող լինել այդ հարցում»,- նշում է ԵՊԲՀ գիտության գծով պրոռեկտոր Կոնստանտին Ենկոյանը։
Մանրամասները՝ տեսանյութում։
Աննա Բաբաջանյան
