Ինչու ԱԱԾ-ն ու ՔԿ-ն մտան Արաբկիրի թաղապետարան․ փոխթաղապետերին՝ կալանք, թաղապետին՝ տնային կալանք. ՏԵՍԱՆՅՈՒԹ

Քննչական կոմիտեն ԱԱԾ աշխատակիցների օժանդակությամբ երեկ քննչական և վարութային գործողություններ էր իրականացրել Արաբկիրի թաղապետարանում, որոնց արդյունքում ձերբակալվել էին թաղապետ Արամ Ազատյանն ու նրա երկու տեղակալները։ Այսօր արդեն հայտնի դարձավ, որ Արաբկիր վարչական շրջանի ղեկավար Արամ Ազատյանի նկատմամբ որպես խափանման միջոց է ընտրվել տնային կալանք՝ համակցված 30 միլիոն դրամ գրավով, իսկ նրա երկու տեղակալներ Գեղամ Կարապետյանն ու Դավիթ Բալասանյանը կալանավորվել են երկու ամսով։

Քաղաքապետարանում Factor TV-ի աղբյուրները հայտնում են, որ Արաբկիրի թաղապետարանի պաշտոնյաների վերաբերյալ քրեական գործով քննության առարկա են ինքակամ կառույցները չքանդելու համար կաշառքի և շենքերի բարեկարգման համար հատկացվող գումարների յուրացման, փաստաթղթերի կեղծման ենթադրյալ հանգամանքները: Ըստ քրեական վարույթի՝ շինարարական ընկերություններից մեկը պետք է զբաղվեր շենքի շքամուտքերի բարեկարգման աշխատանքներով, սակայն այդ աշխատանքները պատշաճ չեն կատարվել, հատկացվող գումարները յուրացվել են: Հենց այս գործընթացին է առնչվում նաև փաստաթղթերի կեղծման ենթադրյալ արարքը:

Իրավապահ համակարգում մեր աղբյուրները հայտնում են, որ գործում առկա են նաև օպերատիվ հետախուզական միջոցառման արդյունքում ձեռք բերված տվյալներ, մասնավորապես, Արաբկիրի թաղապետ Արամ Ազատյանի տեղակալներից մեկի աշխատասենյակում իրականացվել է ներքին դիտում:

Արաբկիր վարչական շրջանի ղեկավարի աշխատակազմի քարտուղար Արշավիր Բակլաչյանն այսօր Factor TV-ի հետ զրույցում երեկ իրականացված խուզարկության, ապա թաղապետի ու փոխթաղապետերի կալանավորման մասին հրաժարվեց խոսել, միայն ասաց, որ իրենք շարունակում են բնականոն հունով աշխատել։

Այսօր ավելի ուշ տարածած հաղորդագրությամբ Քննչական կոմիտեն տեղեկացրեց, որ ՔԿ պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում համապատասխան քրեական վարույթը նախաձեռնվել և քննվում է Քրեական օրենսգրքի մի շարք հոդվածներով՝ պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը, որը պատճառել է առանձնապես խոշոր չափերի գույքային վնաս և կատարվել է մի խումբ պաշտոնատար անձանց կողմից նախնական համաձայնությամբ, դրան օժանդակելը, կաշառք ստանալը, կաշառք տալը և կաշառքի միջնորդությունը։

Ըստ ՔԿ հաղորդագրության՝ ՔՕ տարբեր հոդվածներով մեղադրանքներ է ներկայացվել 8 անձի։ Նրանցից 4-ը, այդ թվում՝ վարչական շրջանի ղեկավարի տեղակալներ Գեղամ Կարապետյանն ու Դավիթ Բալասանյանը կալանավորվել են, Արաբկիր վարչական շրջանի ղեկավար Արամ Ազատյանի նկատմամբ որպես խափանման միջոց է կիրառվել տնային կալանքը՝ համակցված 30 մլն դրամ գրավով,  3 անձի նկատմամբ էլ կիրառվել է բացակայելու արգելքը։

Իրավապահ համակարգում մեր աղբյուրները հայտնում են, որ վարչական շրջանի ղեկավարը մեղադրանքը չի ընդունել՝ այն որակելով անհիմն։

Մանրամասները՝ տեսանյութում։

Արփի Հակոբյան