ԵԽԽՎ նախագահն Ադրբեջանին կոչ է արել անհապաղ վերականգնել Խոշտանգումների կանխարգելման կոմիտեի հետ համագործակցությունը

Շատ եմ ափսոսում, որ Ադրբեջանի իշխանությունները հրաժարվել են համագործակցել Եվրոպայի խորհրդի Խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման կոմիտեի (CPT) հետ, որը հանգեցրել է կոմիտեի ծրագրված այցի աննախադեպ չեղարկմանը։ Մտահոգիչ են նաև կոմիտեի՝ Ադրբեջան կատարած ժամանակավոր այցի վերաբերյալ զեկույցի եզրակացությունները: Այս մասին հայտարարել է ԵԽԽՎ նախագահ Թեոդորոս Ռուսոպուլոսը։

«Ցանկանում եմ ընդգծել, որ Մարդու իրավունքների եվրոպական կոնվենցիայի 3-րդ հոդվածն ամրագրում է ժողովրդավարական հասարակությունների ամենահիմնարար արժեքներից մեկը։ Խոշտանգումների, անմարդկային և նվաստացուցիչ վերաբերմունքի կամ պատժի արգելքը, որը քաղաքակրթության արժեք է և սերտորեն կապված է մարդկային արժանապատվության հարգման հետ, բացարձակ է, որից որևէ շեղում երբևէ թույլատրելի չէ: Հետևաբար, կարևոր է պահպանել բաց և արդյունավետ համագործակցությունը կոմիտեի հետ՝ դրա իրականացումն ապահովելու և ձերբակալվածների նկատմամբ խոշտանգումների կամ դաժան վերաբերմունքի ցանկացած ձև կանխելու համար»,- նշել է ԵԽԽՎ նախագահը։

Նա Ադրբեջանի իշխանություններին կոչ է արել վերանայել իրենց որոշումը և անհապաղ վերականգնել կոմիտեի հետ համագործակցությունն ու կառուցողական երկխոսությունը։

«Սա ոչ միայն կօգնի բարելավել Եվրախորհրդի հետ ընդհանուր հարաբերությունները, այլև կծառայի Ադրբեջանի քաղաքացիների հիմնարար շահերին: Մենք լիովին հանձնառու ենք շարունակել երկխոսությունն Ադրբեջանի խորհրդարանի և կառավարության հետ՝ բոլոր չլուծված խնդիրների լուծման նպատակով»,- հավելել է նա։

Ռուսոպուլոսն ընդգծել է՝ խորապես հավատում է, որ Ադրբեջանի և նրա ժողովրդի շահերից է բխում սերտ և արդյունավետ համագործակցությունը Եվրոպայի խորհրդի բոլոր մարմինների հետ և շահում են այդ համագործակցությունից՝ որպես կառույցի անդամ երկիր։

Հիշեցնենք, որ Եվրոպայի խորհրդի Խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման կոմիտեն հայտարարություն էր տարածել Ադրբեջանի վերաբերյալ՝ նշելով, որ այդ երկրի իշխանությունները հրաժարվում են կառույցի հետ համագործակցությունից։