Սկեսուրը հարսին նկարել է ուտելու ժամանակ, ուղարկել իր դուստրերին

Այսօր Երևան քաղաքի ընդհանուր իրավասության դատարանում ավարտվեց ընտանեկան բռնության գործերից մեկի քննությունը։ Մեղադրող դատախազն ու տուժողի ներկայացուցիչը դիրքորոշում հայտնեցին՝ նշելով, որ մեղադրանքն ապացուցված են համարում դատարանում, ուստի ակնկալում են մեղադրական վճիռ։ Ընդամենը 1,5 տարի փաստացի ամուսնության մեջ գտնվող տղամարդը, մեղադրանքի համաձայն, 2022 թվականի դեկտեմբերին դիտավորությամբ հարվածներ է հասցրել իր կնոջ մարմնի տարբեր հատվածներին՝ պատճառելով թեթև վնասի հատկանիշներ չպարունակող մարմնական վնասվածքներ:

Մեղադրյալը հակիրճ խոսեց, ընդամենն ասաց, որ համաձայն չէ մեղադրանքի հետ։ Ավելի վաղ նա հրաժարվել էր դատարանում ցուցմունք տալուց և պաշտպանի իրավունքից։ Տուժողը դիրքորոշում չհայտնեց։ Ավելի վաղ նա դատարանում ցուցմունք տալիս պատմել էր, որ ամուսնու հետ բնակվել են նրա ծնողների տանը։ Բացի ծեծից՝ կնոջը նաև ծաղրել են, նրա խոսքով՝ սկեսուրը հաց ուտելու ժամանակ նկարահանել է իրեն հեռախոսով, տեսանյութն ուղարկել իր դուստրերին, միասին ծիծաղել են հարսի վրա։

Մերձավոր ազգականի կողմից ֆիզիկական բռնի գործողություններ կատարելու կապակցությամբ նախաձեռնվել է քրեական վարույթ՝ ՀՀ քրեական օրենսգրքի 195-րդ հոդվածի երկրորդ մասի 6-րդ կետի հատկանիշներով, որի համար նախատեսված առավելագույն պատիժը մինչև 2 տարի ազատազրկումն է: Սակայն վերջին տարիների փորձը ցույց է տալիս, որ ընտանեկան բռնության գործերով նմանատիպ մարմնական վնասվածքների դեպքում նշանակվում է տուգանք։

Օգոստոսի 26-ին պարզ կդառնա՝ դատավոր Վարդան Գրիգորյանը մեղադրակա՞ն, թե՞ ոչ մեղադրական վճիռ կհրապարակի։ ՀՀ քրեական դատավարության օրենսգրքում արված փոփոխությունների համաձայն՝ մեղադրական վճռի հրապարակումից հետո միայն հրավիրված լրացուցիչ դատական նիստում քննարկման առարկա են դառնում ամբաստանյալի նկատմամբ պատիժ նշանակելու կամ չնշանակելու, նրա պատասխանատվությունը և պատիժը մեղմացնող ու ծանրացնող հանգամանքներն ուսումնասիրելու, կոնկրետ պատժատեսակը կամ պատժաչափն ընտրելու և այլնի հետ կապված հարցեր:

Արման Ղարիբյան