Բաքվում Ալիևին է ներկայացվել իտալական Leonardo-ից ձեռք բերված ռազմատրանսպորտային ինքնաթիռը․ ԼՈՒՍԱՆԿԱՐՆԵՐ

Բաքվում այսօր Հեյդար Ալիևի անվան միջազգային օդանավակայանում Ադրբեջանի նախագահ Իլհամ Ալիևին է ներկայացվել իտալական Leonardo ընկերության արտադրած C-27J Spartan ռազմատրանսպորտային ինքնաթիռը։ Ադրբեջանական լրատվամիջոցների հաղորդմամբ՝ միջոցառմանը մասնակցել են Իտալիայի պաշտպանության նախարար Գվիդո Կրոզետոն, Իտալիայի արտաքին գործերի և միջազգային համագործակցության փոխնախարար Էդմոնդո Չիրիելին, ինչպես նաև  Leonardo ընկերության նախագահ Ստեֆանո Պոնտեկորվոն։

Դեռևս անցյալ տարի հունիսին իտալական Leonardo կոնցեռնը հայտարարել էր Ադրբեջանի ռազմաօդային ուժերի համար C-27J Spartan ռազմատրանսպորտային ինքնաթիռների մատակարարման պայմանագրի կնքման մասին։ Ստորագրման արարողությանը մասնակցել էին երկու երկրների ՊՆ ներկայացուցիչները։

Մի քանի օր առաջ էլ այցով Իտալիայում էր Ադրբեջանի պաշտպանության փոխնախարար Ագիլ Գուրբանովը, որը հանդիպել էր այդ երկրի պաշտպանության նախարար Գվիդո Կրոզետոյի հետ։ Ադրբեջանական լրատվամիջոցների փոխանցմամբ՝ հանդիպմանը քննարկվել են ռազմական, ռազմատեխնիկական ոլորտներում համագործակցության ներկա իրավիճակը և զարգացման հեռանկարները։ Իսկ այս տարվա փետրվարին Մյունխենում անվտանգության համաժողովի շրջանակում Ալիևը հանդիպել էր Leonardo ընկերության գլխավոր տնօրեն Լորենցո Մարիանիի հետ։

Վերջին տարիներին Հռոմի և Բաքվի ռազմական շփումներն ակտիվ բնույթ են ստացել։ Դեռևս անցյալ տարվա նոյեմբերին Արաբական Միացյալ Էմիրություններում «Dubai Airshow 2023» միջազգային ցուցահանդեսի շրջանակում հանդիպել էին Ադրբեջանի և Իտալիայի պաշտպանության նախարարներ Զաքիր Հասանովն ու Գիդո Կրոզետոն, քննարկել Բաքվի և Հռոմի միջև ռազմական համագործակցության հեռանկարները։ Բացի այդ, Զաքիր Հասանովը «Dubai Airshow 2023» միջազգային ցուցահանդեսում ծանոթացել էր իտալական Leonardo ընկերության արտադրած սպառազինությանն ու ռազմական տեխնիկային։

Հայտնի է դարձել նաև, որ Ադրբեջանում Իտալիայի դեսպանատանը ռազմական կցորդի գրասենյակ է բացվել։

Էմմա Չոբանյան