Ձմեռ պապը չի բարձրացրել աշխատավարձերը. Վարչական դատարանի աշխատակիցները գործադուլ են անում

Վարչական դատարանի աշխատակիցները` դատավորների օգնականներ, գործավարներ այսօր գործադուլ են անում։ Այս մասին տեղեկությունը հաստատվում է Դատական դեպարտամենտի կողմից տարածված հայտարարությամբ։

«Վարչական դատարանի աշխատակիցների կողմից իրականացվող գործադուլը կապված է աշխատավարձերի բարձրացման պահանջի հետ:

Դատական իշխանությունը, դեռևս 2023 թվականից, տարբեր մակարդակներում, տարբեր միջոցներով բազմիցս բարձրացրել է այս ցավոտ խնդիրը։

Դատական դեպարտամենտը և Դատական իշխանության մյուս մարմիններն իրենց լիազորությունների շրջանակում բոլոր հնարավոր գործողությունները կատարել են, և հարցը գտնվում է պետական պատշաճ մարմինների ուշադրության կենտրոնում։

Հուսով ենք՝ դատական ծառայողները բարձր պատասխանատվությամբ կշարունակեն իրենց աշխատանքը` կարևորելով արդարադատության շահը, իսկ անձնական հանգամանքներով պայմանավորված անհնարինության դեպքում՝ իրենց ծառայությունը կիրականացնեն ավելի բարձր վարձատրվող ոլորտներում, մինչև աշխատավարձերի խնդրի համակարգային լուծումը»,- ասված է Դատական դեպարտամենտի հայտարարության մեջ:

Նշենք, որ 2023-ի տարեվերջին ԲԴԽ նախագահ Կարեն Անդրեասյանն իր ֆեյսբուքյան էջում նամակ էր գրել Ձմեռ պապին` ի թիվս այլնի խնդրելով բարձրացնել դատական ծառայողների աշխատանբարձերը:

«Դատական ծառայողները (օգնական, քարտուղար, կարգադրիչ և այլ) այսօր ստանում են 100-200 հազար դրամ աշխատավարձ և կատարում են տաժանակիր ու բոլորիդ ճակատագրերի համար չափազանց կարևոր աշխատանք: Շատ եմ խնդրում, շատ` թո՛ղ բարձրանան նրանց աշխատավարձերը»,- գրել էր Կարեն Անդրեասյանը:

Արաքս Մամուլյան

Կարեն Անդրեասյանը նամակ է գրել Ձմեռ պապին