Ադրբեջանում փոթորիկն ու անձրևներն ավերվածություններ են առաջացրել․ զոհեր ու վիրավորներ կան․ ԼՈՒՍԱՆԿԱՐՆԵՐ

Ադրբեջանի արևմտյան շրջանում երեկ երեկոյան սկսված ուժեղ քամին, փոթորիկն ու անձրևներն ավերածություններ են առաջացրել Գյանջայում, Մինգեչարում, Դաշքեսանում, Գեդաբեյում, Շեքիում, Գախում, Զաքաթալայում, Թովուզում և շրջանների մեծ մասում։ Գյանջայում և Մինգեչաուրում ծառերի տապալման հետևանքով վիրավորներ և զոհեր կան, գրում են ադրբեջանական լրատվամիջոցները։

Ուժեղ քամին տապալել է ծառերը, պոկել տների տանիքները։ Մի շարք վայրերում խոշոր ծառեր են ընկել մեքենաների ու բնակելի շենքերի վրա, մի քանի ժամ շարունակ էլեկտրաէներգիայի և գազի մատակարարման ընդհատումներ են եղել։

Գյանջայի գործադիր իշխանությունը հայտնել է, որ ուժեղ քամին տապալել է մի քանի խոշոր ծառեր և վնասել մի քանի ավտոմեքենա։ Քաղաքի Նիզամի Գյանջևիի պողոտայում գտնվող օբյեկտներից մեկի տանիքը պոկվել է և ընկել ճանապարհի վրա։ Սա նաև երթևեկության դժվարություններ է ստեղծել։ Քաղաքի որոշ հատվածներում էլեկտրաէներգիայի մատակարարումը դադարեցված է։

Մինգեչաուր  քաղաքում ուժեղ քամու հետևանքով զոհեր և վիրավորներ կան։ Ուժեղ քամին քաղաքում տասնյակ ծառեր է տապալել, ինչի հետևանքով հինգ մարդ վիրավորվել է, իսկ Աղդամի շրջանից 21-ամյա Ռավան Գասիմզադեն մահացել է։

Վատ եղանակի հետեւանքով 17 հազար բաժանորդի էլեկտրամատակարարումն ընդհատվել է, 400 բաժանորդի գազամատակարարումը՝ սահմանափակվել։

Աղստաֆայի կենտրոնական զբոսայգում ուժգին քամին արմատախիլ է արել գրեթե հարյուրամյա սոսի ծառը։ Տարածաշրջանի բնակիչները նշել են, որ նման քամու երբեք չի եղել։ Ծառի տապալման հետևանքով տարածքի բնակիչներ՝ 1962 թվականին ծնված Թահիր Աբբասովը և Իլհամ Ռզաևը տարբեր վնասվածքներ են ստացել և հոսպիտալացվել։

Բարդայի շրջանում էլ ուժեղ փոթորկի հետևանքով տապալված մեծ ծառը վնասել է գերեզմանները։

Փոթորկոտ քամիներն ու անձրևները պատել են նաև Արցախը, մասնավորապես, Շուշի քաղաքը։ Այստեղ վնասների մասին դեռևս տեղեկություններ չեն հաղորդվում։

Էմմա Չոբանյան