30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Ալիևի օգնականը հայտարարել է, որ Ադրբեջանի և ՌԴ-ի հարաբերություններն ամենաբարձր մակարդակի վրա են
Քաղաքականություն
21.06.2024 | 16:16
Ադրբեջանի և Ռուսաստանի հարաբերություններն այսօր գտնվում են ամենաբարձր մակարդակի վրա, և դրան նպաստում է 2022 թվականի փետրվարին ստորագրված Դաշնակցային համագործակցության մասին հռչակագիրը։ Այս մասին հայտարարել է Ադրբեջանի նախագահ Իլհամ Ալիևի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը Բաքվում անցկացվող ռուս-ադրբեջանական փորձագիտական խորհրդի հինգերորդ նիստում ունեցած ելույթում։
«Երկու պետությունների միջև Դաշնակցային փոխգործակցության մասին հռչակագիրը վերջին տասնամյակների ընթացքում երկկողմ կապերի ամրապնդման ուղղությամբ իրականացված հետևողական աշխատանքի տրամաբանական արդյունքն է։ Այսօր Ադրբեջանի և Ռուսաստանի հարաբերությունները գտնվում են ամենաբարձր մակարդակի վրա։ Ընդհանուր մշակույթը, պատմությունը և փոխադարձ հարգանքն իրենց ներդրումն են ունեցել դրանց զարգացման գործում»,- ասել է Հաջիևը՝ նշելով, որ դա հնարավոր է դարձել Ադրբեջանի և Ռուսաստանի նախագահներ Իլհամ Ալիևի և Վլադիմիր Պուտինի միջև փոխըմբռնման մակարդակի և նրանց միջև անձնական վստահելի հարաբերությունների շնորհիվ։
Հաջիևը խոսել է նաև տրանսպորտային միջանցքների մասին։
«Ադրբեջանը եվրասիական տրանսպորտային տարբեր նախաձեռնությունների մասնակից է: Այսպիսով, աշխատանքներ են տարվում Հյուսիս-Հարավ միջազգային տրանսպորտային միջանցք ընդլայնման ուղղությամբ: Ադրբեջանը շարունակում է ակտիվորեն ներդրումներ կատարել լոգիստիկ այս կառույցի զարգացման համար, և միջանցքի ադրբեջանական հատվածի հնարավորություններն ընդլայնվում են։ Անկասկած, դա օգուտ կբերի ոչ միայն Ադրբեջանին և Ռուսաստանին, այլև ամբողջ տարածաշրջանին»,- հայտարարել է Ալիևի օգնականը։
