20.04.2026 | 13:10
Իսրայելի ԱԳ նախարարը Լիբանանում իսրայելցի զինվորի կողմից Քրիստոսի արձանի վնասումն «ամոթալի» է անվանել
550 մլն ավելի գումար կարմիր գծերի վճարումներից.ինչ ազդեցություն է ունեցել կայանատեղիների թանկացումը. ՏԵՍԱՆՅՈՒԹ
Հասարակություն
20.06.2024 | 21:54
Այս տարեսկզբից վարորդները «Ա» գոտում կայանելու մեկ տարվա համար 160,000 դրամ են վճարում՝ նախկին 12,000 դրամի փոխարեն։ Տրանսպորտային միջոցի կայանումն անվճար է միայն կիրակի օրերին, մինչև 15 րոպե կայանելու դեպքում, ինչպես նաև ժամը 22:00-ից մինչև 09:00-ն։ Այս տարվա փետրվարի 13-ի ավագանու նիստում Ավինյանը պնդում էր, որ կարմիր գծերի վճարների թանկացումն այնքան էլ չի մեծացրել բյուջեի մուտքերը։
Այսպիսով, այս տարվա հունվարի 1-ից մինչև մայիսի 31-ը Երևանի «Ա» և «Բ» գոտիներում կայանելու համար Երևան համայնքի եկամտային հաշվեհամարներին փոխանցվել է 1 մլրդ 184 մլն դրամ։ Սրանից 899 մլն դրամը վճարվել է «Ա» գոտու և միայն 285 մլն դրամը՝ «Բ» գոտու համար։ 2023 թվականի նույն ժամանակահատվածում վճարովի ավտոկայանատեղում ավտոտրանսպորտային միջոցը կայանելու համար վճարվել է 632 մլն դրամ։ 2023 թվականի ընթացքում ավտոկայանատեղի կայանումը, ըստ գոտիավորման սահմանված չլինելու հետևանքով, առանձին հաշվառում չի իրականացվել:
Ստացվում է՝ այս տարվա առաջին 5 ամիսներին կայանատեղիների վճարումներից համայնքային բյուջե է մուտքագրվել շուրջ 550 մլն դրամով ավելի գումար, քան անցյալ տարվա նույն ժամանակահատվածում։ Քաղաքապետարանից վստահեցնում են՝ փոփոխության արդյունքում Երևան քաղաքի կենտրոնում մշտական կայանվող մեքենաների քանակը կտրուկ նվազել է:
«Ճանապարհային երթևեկության անվտանգության և վերահսկողության» ՀԿ անդամ Արտակ Գաբոյանը, ծանոթանալով քաղաքապետարանի պատասխանին, կենտրոնում կայանվող մեքենաների քանակի կտրուկ նվազման մասին պնդումը ծիծաղելի է գնահատում։ Ըստ նրա՝ միայն կայանման թանկացումը շատ քիչ է կենտրոնի բեռնաթափումն ապահովելու համար։
Գաբոյանի դիտարկմամբ՝ քաղաքապետարանը ևս մեկ անգամ հաստատում է, որ թեև պակասել է կայանման տարեկան բաժանորդագրության վճարողների քանակը, այնուամենայնիվ, ավելացել է քաղաքապետարան մուտքերի ծավալը։
Քաղաքապետարանից Factor TV-ի հարցմանն ի պատասխան նաև փոխանցել են, որ այս տարվա հունվարի 1-ից մինչև մայիսի 31-ը կարմիր գծերում կայանման համար վճարում է արվել 8,264 տրանսպորտային միջոցի համար, իսկ 2023-ի նույն ժամանակահատվածում՝ 41,136 տրանսպորտային միջոցի, այսինքն՝ այս տարի անցյալ տարվա համեմատ մոտ 5 անգամ նվազում է գրանցվել։
Մանրամասները՝ տեսանյութում։
Անի Թամրազյան
