Պուտինը Վիետնամում է․ կողմերը համաձայնագրեր են կնքել և պայմանավորվածություններ ձեռք բերել

Հյուսիսային Կորեա այցից հետո ՌԴ նախագահ Վլադիմիր Պուտինը երկօրյա այցով Վիետնամում է։ Պուտինն այստեղ հանդիպել է Վիետնամի նախագահ Թո Լամի հետ։ ՌԲԿ-ի հաղորդմամբ՝ Ռուսաստանն ու Վիետնամը մի շարք փաստաթղթեր են ստորագրել նախագահ Վլադիմիր Պուտինի՝ Հանոյ կատարած այցի շրջանակում։ Կողմերը պայմանավորվել են ամրապնդել համապարփակ ռազմավարական գործընկերությունը։

Ռուսաստանը և Վիետնամը նաև համաձայնագիր են ստորագրել բարձրագույն կրթության ոլորտում համագործակցության մասին և հուշագիր՝ միջուկային գիտության և տեխնոլոգիաների կենտրոնի կառուցման նախագծի իրականացման ժամանակացույցի վերաբերյալ։

Վիետնամի նախագահ Թո Լամը Պուտինի հետ բանակցություններից հետո հայտարարել է ի վնաս միմյանց երրորդ երկրների հետ դաշինքներին չմիանալու վերաբերյալ ձեռք բերված պայմանավորվածության մասին։

«Մենք համաձայնության ենք եկել Վիետնամի և Ռուսաստանի Դաշնության միջև համապարփակ ռազմավարական գործընկերության հետագա ամրապնդման հիմնական ուղեցույցների և սկզբունքների շուրջ: Մենք նաև պայմանավորվել ենք ամրապնդել համագործակցությունը՝ հավասարության, փոխադարձ հարգանքի և միմյանց ներքին գործերին չմիջամտելու սկզբունքներին համապատասխան»,- ասել է նա։

Պուտինն իր հերթին ասել է, որ Մոսկվան և Հանոյը դեմ են Ասիա-խաղաղօվկիանոսյան տարածաշրջանում փակ ռազմաքաղաքական դաշինքների ստեղծմանը։

«Ասիա-խաղաղօվկիանոսյան տարածաշրջանում ստեղծված իրավիճակը քննարկելիս փոխադարձ շահագրգռվածություն է արտահայտվել այս տարածաշրջանում ուժի չկիրառման և վեճերի խաղաղ կարգավորման սկզբունքների հիման վրա անվտանգության հուսալի և համարժեք ճարտարապետության կառուցման հարցում, որում  տեղ չի լինի փակ ռազմաքաղաքական դաշինքների համար»,- նշել է ՌԴ նախագահը՝ միաժամանակ հայտնելով, որ երկու երկրներն անցնում են  ազգային արժույթով վճարումներին։

Նախատեսված են նաև Պուտինի հանդիպումները Վիետնամի Կոմունիստական ​​կուսակցության կենտրոնական կոմիտեի գլխավոր քարտուղար Նգուեն Ֆու Չոնգի, վարչապետ Ֆամ Մին Թինի և Ազգային ժողովի նախագահ Չան Տխան Մանի հետ։