07.10.2026 | 14:29
Սեպտեմբերին Հայաստան է այցելել 290 հազար զբոսաշրջիկ․ Պապոյան
ՌԴ ԱԳՆ-ն մեկնաբանել է Հայաստանի և Ֆրանսիայի միջև ռազմական համագործակցության ամրապնդումը
Քաղաքականություն
20.06.2024 | 11:33
Հարավային Կովկասում Արևմուտքի օրակարգը միշտ չէ, որ համապատասխանում է տարածաշրջանի երկրների շահերին։ Այս մասին ՌԻԱ Նովոստիին ասել է ՌԴ փոխարտգործնախարար Միխայիլ Գալուզինը՝ մեկնաբանելով Փարիզի ու Երևանի միջև ռազմական համագործակցության ամրապնդումը։
«Արտատարածաշրջանային երկրները Հարավային Կովկաս են գնում իրենց օրակարգով, որը, մեղմ ասած, միշտ չէ, որ համապատասխանում է տարածաշրջանային երկրների շահերին։ Այսօր արևմտյան երկրները շարժվում են դեպի Հարավային Կովկաս՝ բացահայտ առճակատման հակառուսական օրակարգով։ Մենք կարծում ենք, որ դա չի նպաստի Անդրկովկասում կայունությանն ու անվտանգությանը»,- ասել է Գալուզինը։
Նա նշել է, թե Մոսկվայի կարծիքով՝ «տարածաշրջանային անվտանգությունը կարող է առավելագույնս արդյունավետ կերպով ապահովել համապատասխան տարածաշրջանի պետությունների ջանքերով»։
«Մենք կողմնակից ենք տարածաշրջանային պատասխանատվության թե՛ անվտանգության ապահովման, թե՛ Հարավային Կովկասում և այլ տարածաշրջաններում տնտեսական ինտեգրման առումով»,- հավելել է ՌԴ ԱԳ փոխնախարարը։
Ավելի վաղ էլ Գալուզինը հայտարարել էր, թե ֆրանսիական ինքնագնաց հրետանային CAESAR 155 միլիմետրանոց համակարգերի մատակարարումը Հայաստանին վտանգում է հանգեցնել իրավիճակի վատթարացման։
