11.01.2025 | 19:09
Երկրաշարժ Սպիտակ քաղաքից 1 կմ հյուսիս
Ադրբեջանի մասնաբաժինը ԵՄ բնական գազի շուկայում հասել է 7 տոկոսի
Քաղաքականություն
18.06.2024 | 23:30
Ադրբեջանն անցյալ տարի 11 միլիարդ խորանարդ մետր բնական գազ է արտահանել ԵՄ երկրներ։ Այս մասին ասվում է Եվրահանձնաժողովի 2023 թվականի վերջին եռամսյակի զեկույցում: Այսպիսով, Ադրբեջանի մասնաբաժինը ԵՄ գազի ընդհանուր ներմուծման մեջ 2021 թվականի 3 տոկոսից (8 մլրդ խմ) աճել է՝ հասնելով 7 տոկոսի, գրում են ադրբեջանական լրատվամիջոցները։
Նախորդ տարի ԵՄ բնական գազի ներմուծումը կազմել է 290 մլրդ խմ, իսկ սպառումը՝ 330 մլրդ խմ, ինչը, համապատասխանաբար, 13,4 տոկոսով և 7,3 տոկոսով պակաս է նախորդ տարվա համեմատ։
ԵՄ-ն 2023 թվականին Ռուսաստանից գազի ներկրումը կրճատել է 3,5 անգամ՝ 150 միլիարդ խորանարդ մետրից հասնելով 43 միլիարդ խորանարդ մետրի։ Սա պայմանավորված է ռուս-ուկրաինական պատերազմի և սեզոնային ջերմաստիճանի բարձրացման պատճառով սահմանված պատժամիջոցներով։
Հավելենք, որ է Bloomberg-ը, հղում անելով իր աղբյուրներին, օրերս հայտնել էր, որ ԵՄ պաշտոնյաները բանակցություններ են վարում 2025 թվականին Ռուսաստան-Ուկրաինա առանցքային խողովակաշարով գազի մատակարարումների շարունակման շուրջ: Նշվում է, որ քննարկվող տարբերակներից մեկն այն է, որ եվրոպական ընկերությունները գազ գնեն Ադրբեջանից և մղեն այն Եվրոպա գնացող ռուսական խողովակաշարեր։
«Նման համաձայնությունը թույլ կտար Եվրոպային խուսափել ռուսական գազ գնելու անհարմարությունից այն ժամանակ, երբ նա փորձում է կրճատել Մոսկվայի եկամուտները»,- նշում է Bloomberg-ը։
Ըստ Bloomberg-ի՝ համապատասխան բանակցությունների արդյունքները, որոնք դեռ վաղ փուլում են, պետք է ակնկալել 2024 թվականի վերջին, երբ ճնշումը մեծանա Ուկրաինայի հետ ռուսական գազի տարանցման պայմանագրի ժամկետի ավարտի մոտենալու ֆոնին և եվրոպական ձմեռը մոտ կլինի։
Քննարկումների մասնակիցների մեկը, ըստ տեղեկությունների, գերմանական Uniper SE էներգետիկ կոնցեռնն է, որն ազգայնացվել է գերմանական իշխանությունների կողմից՝ 2022 թվականի ամռանը Ռուսաստանի Դաշնությունից գազի մատակարարումների կրճատումից հետո նրա սնանկացումը կանխելու նպատակով։
Այս լուրերի ֆոնին էլ Ադրբեջանի պետական նավթային SOCAR ընկերության նախագահ Ռովշան Նաջաֆը և ռուսական «Գազպրոմ»-ի խորհրդի նախագահ Ալեքսեյ Միլլերը բավական հաճախ են բանակցություններ անցկացնում։ Մասնավորապես, 2024 թվականին նրանք հանդիպել են արդեն 3 անգամ։ Միլլերի ու Նաջաֆի վերջին հանդիպումը տեղի էր ունեցել հունիսի 7-ին Պետերբուրգի տնտեսական ֆորումի շրջանակում։ Կողմերը քննարկել էին գազի ոլորտում համագործակցության ընթացքն ու հեռանկարները, հատուկ ուշադրություն էր դարձվել համաշխարհային էներգետիկ շուկայում տիրող իրավիճակին։
Էմմա Չոբանյան
