07.10.2026 | 17:05
Փաշինյանը սխալվում է․ կին համայնքապետեր ՀՀ-ում եղել են նաև 2018-ից առաջ
Թեհրանը հայտնել է Իրանի և Ադրբեջանի առաջին համատեղ զորավարժությունների անցկացման մասին
Քաղաքականություն
13.06.2024 | 23:07
Իրանի և Ադրբեջանի հատուկ նշանակության ստորաբաժանումները մեկօրյա զորավարժություններ են անցկացրել՝ ահաբեկչության դեմ պայքարի և Արաքսի վրա ամբարտակի կայուն անվտանգությունն ապահովելու նպատակով։ Այս մասին հայտարարել է Իրանի ցամաքային զորքերի հրամանատարի տեղակալ Քերիմ Չեշակը, հաղորդում է ԻՌՆԱ-ն։
«Այս զորավարժության նպատակն է ապահովել առողջ ռազմական ծրագիր՝ օգտագործելով տարբեր օպերատիվ մարտավարություններ և տեխնիկա ահաբեկչական ուժերի և կազմակերպված հանցավորության դեմ պայքարի համար, մշակել համատեղ շտաբներ և հետախուզական միջոցառումներ՝ ցանկացած տեսակի սպառնալիքների դեմ պայքարելու համար, փոխանցել գիտելիքներ և փորձ»,- ասել է նա։
Խոսելով զորավարժությունների նպատակների մասին՝ Չեշակը կարևորել է երկկողմ հարաբերությունների ամրապնդումը ռազմավարական և գործառնական մակարդակով երկու երկրների զինված ուժերի համատեղ հանձնաժողովի միջոցով, խաղաղության պահպանումը և ընդհանուր շահերի պաշտպանությունը Հարավային Կովկասի աշխարհաքաղաքական գոտում կայուն անվտանգության զարգացման համար։ Ըստ նրա՝ զորավարժությունների կարևորագույն ուղերձը տարածաշրջանային խաղաղության և կայունության հաստատումն է։
Ըստ բարձրաստիճան զինվորականի՝ զորավարժությունն անցկացվել է չորս փուլով, որոնք ներառում են հետախուզական գործողություն՝ անօդաչու թռչող սարքերի և ուղղաթիռների մասնակցությամբ, սահմանապահ պարեկային գործողություններ, դարանակալումների կազմակերպում, հրետանային և օդային հարվածների կիրառում։
Հավելենք, որ Ադրբեջանի ՊՆ-ն հայտարարել էր, որ 2024 թվականի ուսումնական պլանի համաձայն՝ հունիսի 12-ին Նախիջևանում տեղակայված Ադրբեջանի ԶՈւ ստորաբաժանումներում մարտավարական զորավարժություններ են անցկացվելու։ Նշվում էր, որ անձնակազմի, ռազմական տեխնիկայի, ավիամիջոցների, ԱԹՍ-ների ներգրավմամբ զորավարժությունների ընթացքում հիմնական ուշադրությունը դարձվելու է հրամանատարների որոշումներ կայացնելու հմտություններին ու պրոֆեսիոնալիզմին, ինչպես նաև՝ ստարաբաժանումների միջև հաղորդակցության բարելավմանը։
Հաղոդվում էր, որ Թեհրանի և Բաքվի միջև ձեռք բերված պայմանավորվածության հիման վրա Իրանի տարածքում զուգահեռաբար անցկացվելու են մարտավարական զորավարժություններ՝ իրանական բանակի համապատասխան ուժերի և միջոցների ներգրավմամբ։ Զորավարժությունները, որոնք անցկացվելու են երկու երկրներում, համակարգված իրականացվելու են «հնարավոր սադրիչ և դիվերսիոն գործողություններից պաշտպանության համար» տարբեր առաջադրանքներ։
Էմմա Չոբանյան
