Ռուսական բրոքերները փակել են արժույթի դուրսբերումն ու մուտքագրումը Մոսկվայի բորսայի դեմ պատժամիջոցներից հետո

Ռուսական խոշոր բրոքերները փակել են իրենց հաճախորդների համար հաշիվներից արժույթ հանելու հնարավորությունը Մոսկվայի բորսայի դեմ ԱՄՆ պատժամիջոցներից հետո, ինչի արդյունքում Ռուսաստանը 1990-ականներից ի վեր առաջին անգամ մնացել է առանց բորսայի առևտրի համաշխարհային հիմնական արժույթներով, գրում է The Moscow Times-ը։

Finam-ի հաճախորդների բրոքերային հաշիվներում ԱՄՆ դոլարը, եվրոն և Հոնկոնգյան դոլարը արտացոլվում են որպես «արգելափակված», և դրանց դուրսբերումն ու մուտքագրումը ներկայում անհասանելի է, «Ինտերֆաքս»-ին հայտնել են Finam-ի մամուլի ծառայությունից, որը 10 խոշորագույնների թվում է Ռուսաստանում և մինչև պատերազմի սկիզբն ուներ ավելի քան 300 հազար հաճախորդ։

«Մեզ որոշ ժամանակ կպահանջվի՝ բորսայից արգելափակված միջոցների ծավալի մասին տվյալներ ստանալու, ներքին հաշվարկներ կատարելու և անհրաժեշտ գործողություններ կատարելու համար, որպեսզի ներդրողները հնարավորություն ունենան տնօրինել իրենց միջոցները»,- պարզաբանել է Finam-ը։

Նմանատիպ իրավիճակ է ստեղծվել նաև БКС-ի հետ, որը հաճախորդների թվով հինգերորդ ռուսական բրոքերն է:
Մոսկվայի բորսան վստահեցնում է, որ հաճախորդների արժույթին ոչինչ չի սպառնում։

«Իրականացված միջոցառումների արդյունքում առևտրի մասնակից հաճախորդների հաշվարկային ծածկագրերի արտարժույթով դրամական միջոցներին ձեռք չի տրվել»,- ասվում է առևտրային հարթակի հաղորդագրությունում։

Ռուսաստանի Կենտրոնական բանկը նախօրեին նաև հավաստիացրել էր, որ ֆիզիկական և իրավաբանական անձանց հաշիվներում արժույթը չի տուժի։

«Քաղաքացիների և ընկերությունների հաշիվներում և ավանդներում ԱՄՆ դոլարով և եվրոյով բոլոր միջոցները մնում են անվտանգ»,- նշել է Կենտրոնական բանկը՝ հայտարարելով արտարժույթի առքուվաճառքի դադարեցման մասին։

Չորեքշաբթի երեկոյան ԱՄՆ-ի Ֆինանսների նախարարությունը հայտարարեց Մոսկվայի բորսան և դրա հիմնական հաշվարկային կառույցները՝ Ազգային հաշվարկային դեպոզիտարիան և Ազգային քլիրինգային կենտրոնը սև ցուցակում ներառելու մասին: Արդյունքում Ռուսաստանում դե ֆակտո դադարել է գոյություն ունենալ համաշխարհային հիմնական արժույթների փոխանակման շուկան։

Այսուհետ դոլարի և եվրոյի պաշտոնական փոխարժեքը կսահմանվի արտաբորսային շուկայական գործարքների և բանկային հաշվետվությունների հիման վրա, հաղորդում է Կենտրոնական բանկը։ Կառույցը համապատասխան պլան է պատրաստում 2022 թվականի ամառվանից, իսկ նրա ղեկավար Էլվիրա Նաբիուլինան դեկտեմբերին վստահեցրել էր, որ պատժամիջոցները չեն հանգեցնի ռուբլու արժեզրկման։