Եթե ՀՀ-ն ուզում է՝ Պաղեստինի չվերածվի, պիտի մոբիլիզացվի՝ պետության կառուցման գործում․ պահե՛լ ինքնիշխանությունը․ Սարո Սարոյան․ ՏԵՍԱՆՅՈՒԹ

ԱՄՆ-ն ու ՀՀ-ն պայմանավորվեցին երկու երկրների միջև ռազմավարական երկխոսությունը բարձրացնել նոր՝ ռազմավարական գործընկերության հանձնաժողովի մակարդակի։ ԱՄՆ-ը ներգրավվում է նաև ՀՀ Զինված ուժերի, անվտանգային բարեփոխումներում։ Նաև տնտեսական առավել սերտացման մասին է եղել պայմանավորվածություն։

Եվ մինչ Երևանում կայանում է ՀՀ-ԱՄՆ ռազմավարական երկխոսության նիստ, դրա ֆոնին՝ ՌԴ ԱԳ փոխնախարար Գալուզինն է բողոքում, որ ՀՀ-ն չի շփվում ՌԴ-ի հետ՝ ՊՆ և ԱԳՆ խողովակներով։

ՀՀ-ԱՄՆ ռազմավարական երկխոսության նիստում կարևոր տեղ ունի անվտանգության հարցը՝ ԱՄՆ-ը ներգրավվում է ՀՀ ԶՈւ-երի բարեփոխումների գործում։ Տարիներ ի վեր ՀՀ արտաքին քաղաքականությունը հիմնված է եղել ՌԴ-ի նկատմամբ հավատարմության վրա՝ այն ակնկալիքով, որ ռուսը թույլ չի տա, որ թուրքը մեզ ուտի՝ պայմանական բանաձևով։ Միաժամանակ, Վրաստանի իշխանության ռուսամետ վարագծի պատճառով լարվել է Արևմուտքի հետ հարաբերությունը։

Քաղաքագետ Սարո Սարոյանին Factor TV-ի հետ զրույցում հարց ուղղեցինք՝ այս ֆոնին ինչպե՞ս է գնահատում ԱՄՆ-ի որոշումը ՀՀ-ի հետ հարաբերության կարգավիճակը բարձրացնել՝ ռազմավարական երկխոսությունից՝ ռազմավարական գործընկերության հանձնաժողովի մակարդակի։

«Հայաստանի՝ պրոարևմտյան կողմնորոշման գործընթացն առաջ է գնում՝ անկախ վայրիվերումներից։ Դրանք չեն ազդում պրոցեսների վրա, Արևմուտքի հետ գործակցությունն ինտենսիվ է, և մենք տեսնում ենք, որ անվտանգության բաղադրիչը վերափոխման է ենթարկվել։ Պետքարտուղարի տեղակալի այցը ՀՀ դրա վկայությունն է։ ՌԴ-ն չի դիմադրում իր դիրքերի թուլացմանը և ռեգիոնից հեռանալուն, բայց առճակատում կա ՀՀ-ի ներքաղաքական կյանքում՝ ՌԴ-ն այդ միավորների միջոցով երևում է դաշտում։ Նրա ուժը ռուսական զինվորն է ՀՀ-ում։ ՌԴ-ն չի դիմադրում իր ռազմական հենակետերի դուրսբերմանը ՀՀ-ից՝ զիջում է, և զուգահեռ՝ կա Արևմտյան թափանցում ռեգիոն և ռուսական դիրքերի թուլացում»,- ասում է նա։

Քաղաքագետը պնդում է, որ Հարավային Կովկասը 200 տարի ՌԴ-ի ազդեցության գոտին էր, բայց հիմա շատ մեծ փոփոխություն է տեղի ունենում։ Ըստ Սարոյանի՝ «Զանգեզուրի միջանցք» վերցնելով՝ ՌԴ-ն փորձում է ռեգիոնում մնալու խնդիր լուծել, բայց ՀՀ-ն չի զիջում, պայքար կա նաև ՌԴ-ի կողմից։

Սարոյանը պնդում է նաև, որ ՀՀ-ն պետք է իրեն դիրքավորի որպես ինքնուրույն խաղացող՝ սեփական շահերը սպասարկելու նպատակով։ Եվ, ըստ նրա, որպեսզի Հայաստանի «աբխազացում» տեղի չունենա, ՀՀ-ում պետք է մոբիլիզացիա տեղի ունենա պետության կառուցման շուրջ։

Հարցազրույցն ամբողջությամբ՝ տեսանյութում։

Ռոբերտ Անանյան