23.11.2024 | 00:35
Թրամփի հետ հեռախոսազրույցը տեղեկատվական էր, բայց նաև շատ պոզիտիվ. Փաշինյան. ՏԵՍԱՆՅՈՒԹ
Միջազգային արբիտրաժային դատարանը «Գազպրոմ»-ին պարտավորեցրել է 14 մլրդ դոլար վճարել՝ Գերմանիա գազի մատակարարումը դադարեցնելու համար
Քաղաքականություն
12.06.2024 | 22:37
Ստոկհոլմում միջազգային արբիտրաժը բավարարել է գերմանական Uniper էներգետիկ կոնցեռնի հայցն ընդդեմ ռուսական «Գազպրոմ» կոնցեռնի՝ ավելի քան 13 միլիարդ եվրոյի (14 միլիարդ դոլար) չափով փոխհատուցման և Գերմանիա գազի մատակարարման դադարեցման պահանջով, գրում է The Moscow Times-ը։
Որոշումն ընդունվել է հունիսի 7-ին և վերաբերում է ռուսական ընկերության կողմից 2022 թվականի կեսերից սկսած գազային պայմանագրերի խախտումներին, հայտնել է Uniper-ը։
«Uniper-ը որոշել է խզել ռուսական գազի մատակարարման իր երկարաժամկետ պայմանագրերը և այդպիսով իրավաբանորեն դադարեցրել է գազի մատակարարման երկարաժամկետ հարաբերությունները ռուսական «Գազպրոմ Էքսպորտ» պետական ընկերության հետ»,- ասվում է հաղորդագրության մեջ։
Արբիտրաժային վճռի համաձայն՝ «Գազպրոմ»-ից վերադարձվող բոլոր միջոցները կուղղվեն անմիջապես Գերմանիայի դաշնային կառավարությանը, որը դարձել է Uniper-ի սեփականատերն այն բանից հետո, երբ ընկերությունը հայտնվել է սնանկացման եզրին:
Ստոկհոլմի արբիտրաժային դատարանի որոշումն իրավաբանորեն պարտադիր է և վերջնական։
Նախկինում Գերմանիայում ռուսական գազի ամենախոշոր գնորդը և «Հյուսիսային հոսք 2» նախագծի ներդրողներից մեկը՝ Uniper-ը, դադարեցրել է ռուսական գազ ստանալ պայմանագրային ծավալներով անմիջապես այն բանից հետո, երբ ՌԴ նախագահ Վլադիմիր Պուտինը պահանջել է դրա համար վճարել «ռուբլով»:
Մատակարարումներն ամբողջությամբ դադարեցվել են 2022 թվականի աշնանը, երբ Բալթիկ ծովում պայթեցվել է «Հյուսիսային հոսք» խողովակաշարի երեք գիծ։ Արդյունքում Uniper-ը ստիպված է եղել գազ գնել սփոթային շուկայում ռեկորդային բարձր գներով: Ընկերությունը ֆինանսական կոլապսից փրկելու համար Գերմանիայի կառավարությունը հատկացրել է 29 միլիարդ եվրո, իսկ հետո ստիպված է եղել այն ազգայնացնել։ 2023 թվականին ընկերությունը կրկին շահութաբեր է դարձել և սկսել պատրաստվել սեփականաշնորհման։
