24.04.2026 | 00:23
Սպերցյանի գոլն օգնել է «Կրասնոդարին» հաղթել «Սպարտակին»․ ՏԵՍԱՆՅՈՒԹ
Արցախից ռուս խաղաղապահների դուրսբերման գործընթացն ամբողջությամբ ավարտվել է
Քաղաքականություն
12.06.2024 | 15:21
Արցախում տեղակայված ռուսական խաղաղապահ զորախմբի դուրսբերման գործընթացը հունիսի 12-ին ավարտվել է։ Այս մասին հայտարարություն է տարածել Ադրբեջանի ՊՆ-ն։
«Խաղաղապահ զորախմբի անձնակազմը, սպառազինությունն ու տեխնիկան ամբողջությամբ լքել են մեր տարածքը»,- ասվում է հաղորդագրության մեջ։
Իվանյան բնակավայրի օդանավակայանում, որտեղ տեղակայված էր ՌԴ խաղաղապահ զորախմբի հրամանատարության շտաբը, բարձրացվել է Ադրբեջանի դրոշը։
Նշենք, որ ավելի վաղ Իվանյանի օդանավակայանում տեղի էր ունեցել հանդիսավոր արարողություն՝ նվիրված ռուսական խաղաղապահ զորախմբի առաքելության ավարտին։ Ադրբեջանական լրատվամիջոցները հրապարակել էին տեսանյութ, որում երևում է, որ ռուս խաղաղապահների ռազմական տեխնիկան արարողության ավարտից հետո լքում է շրջանը։
Հիշեցնենք՝ ապրիլի 16-ի երեկոյան ադրբեջանական լրատվամիջոցները հայտնել էին, որ հայկական Դադիվանք վանական համալիրի պաշտպանությունը ռուս խաղաղապահները փոխանցել են ադրբեջանական ոստիկանությանը։ Դրանից հետո սկսեցին տարածվել ռուս խաղաղապահների տեխնիկայի շարասյուների տեղաշարժի տեսանյութեր։ Ավելի ուշ պաշտոնական Բաքուն ու Մոսկվան հաստատեցին, որ սկսվել է Արցախից ռուս խաղաղապահների վաղաժամ դուրսբերման գործընթացը։ Ապրիլի 22-ին էլ Ադրբեջանի նախագահ Իլհամ Ալիևը մեկնել էր ՌԴ՝ նախագահ Վլադիմիր Պուտինի հետ բանակցությունների։ Այցից հետո Ալիևը հայտարարել էր, որ Արցախից ռուս խաղաղապահների վաղաժամ դուրսբերման որոշումը կայացվել է Պուտինի հետ համատեղ։
Էմմա Չոբանյան
