Մոսկվան չի մարսում Բուչա այցը. Կրեմլում մտահոգված են և բողոքի նոտա են հղել Երևան. ՏԵՍԱՆՅՈՒԹ

Մոսկվան սուր քննադատության հերթական չափաբաժինն է ուղղում Երևանին․ ՌԴ Արտաքին գործերի նախարարությունը բողոքի նոտա է հղել Հայաստանին՝ Ուկրաինայում ՀՀ դեսպան Վլադիմիր Կարապետյանի և Երևանի Նոր Նորք վարչական շրջանի ղեկավար Տիգրան Տեր-Մարգարյանի Բուչա կատարած այցից հետո: Հիշեցնենք՝ հայ պաշտոնյաների այցը տեղի է ունեցել հունիսի 2-ին, նրանք հանդիպել են Բուչայի քաղաքապետ հետ։ Ըստ պաշտոնական հաղորդագրության՝ քննարկվել են Բուչայի և Երևանի Նոր Նորք վարչական շրջանի միջև համագործակցության հաստատման հնարավորությունները։

«Մենք հպարտ ենք ուկրաինացի ժողովրդի խիզախությամբ և մշտապես պատրաստ ենք աջակցելու Բուչային և պատերազմական գործողությունների արդյունքում տուժած մյուս համայնքներին»,- ասել է Նոր Նորքի վարչական ղեկավարը։

Տիգրան Տեր-Մարգարյանը նաև Երևանի քաղաքապետի անունից Կիևի քաղաքապետին հրավիրել է Հայաստան։

Այս այցը ռուսական կողմը համարում է ոչ բարեկամական։ ՌԴ ԱԳՆ ներկայացուցիչ Մարիա Զախարովան դժգոհում է, որ վարչական շրջանի ղեկավարը, ըստ նրա, «արևմտամետ դիրքորոշում ունեցող Արամ Սարգսյանի կուսակիցն է»։ Ռուս պաշտոնյան ցավալի է համարում, որ ՀՀ իշխանությունները համերաշխ են այս հայտարարության հետ։

«Երևանի Նոր-Նորք վարչական շրջանի ղեկավար Տիգրան Տեր-Մարգարյանի և Ուկրաինայում ՀՀ դեսպան Վլադիմիր Կարապետյանի այցը Բուչա քաղաք պաշտոնական Երևանի բացահայտ ոչ բարեկամական քայլ ենք համարում։ Մեզ անհանգստացնում է Ուկրաինայի ԶՈւ-ն կարիքներին նրանց կողմից օգնություն տրամադրելը և այնտեղ Ռուսաստանի դեմ արված անընդունելի հայտարարությունները։ ԱԺ նախագահ Ալեն Սիմոնյանն այսօր լրագրողների հետ ճեպազրույցում հրաժարվեց թեման մեկնաբանել»,- նշել է Զախարովան։

Մոսկվայի դժգոհությունների ֆոնին ՔՊ-ի հետ կոալիցա կազմած «Հանրապետություն» կուսակցության անդամ, Երևանի Նոր Նորք վարչական շրջանի ղեկավար Տիգրան Տեր-Մարգարյանը հայտարարում է, որ անհրաժեշտության դեպքում պատրաստ է կրկին այցելել Բուչա։

«Ազատ քաղաքացի» ՀԿ նախագահ Հովսեփ Խուրշուդյանը Մոսկվայի այս բողոքի նոտան համարում է Հայաստանի ներքին գործերին միջամտելու փորձ։

Ընդդիմադիր «Հայաստան» խմբակցության պատգամավոր Գեղամ Մանուկյանի կարծիքով՝ բողոքի այս նոտան ծանր հետևանք է ունենալու Հայաստանի համար։

Ըստ պաշտոնական հաղորդագրության՝ հայկական պատվիրակությունը մարդասիրական օգնություն է նվիրաբերել Բուչային՝ դեղամիջոցների տեսքով, որը նախատեսված է քաղաքի բժշկական հաստատությունների համար։ «Ուկրաինայի ԶՈՒ-ի կարիքների համար» ենթադրյալ օգնության մասին հաղորդագրությունում որևէ հիշատակում չկա: Այնուհանդերձ, հարց է առաջանում, թե ինչո՞ւ է ռուսական կողմը քննադատում Հայաստանին՝ իր թշնամուն մարդասիրական օգնություն տրամադրելու համար, երբ տարիներ շարունակ Ռուսաստանը բացահայտ զինում էր Հայաստանի հետ թշնամական հարաբերությունների մեջ գտնվող Ադրբեջանին։

2011-2020 թվականներին Ադրբեջանի սպառազինության ծավալի 67%-ը եղել է Ռուսաստանի և Բելառուսի մատակարարած զենքերը՝ ըստ Ստոկհոլմում գործող Միջազգային խաղաղության ուսումնասիրության ինստիտուտի։ Իսկ Ադրբեջանում ՌԴ դեսպան Եվդոկիմովը 2023-ի սեպտեմբերի 19-ին Արցախում Ադրբեջանի իրականացրած ագրեսիան, որը հանգեցրեց 100 հազարից ավելի հայերի բռնի տեղահանության և Արցախի էթնիկ զտման, անվանել է «հակաահաբեկչական գործողություն»։ Մոսկվան քաղաքական գնահատական չի տվել Ադրբեջանի կողմից ՀՀ սուվերեն տարածքներն օկուպացնելուն, չի արձագանքել երկկողմ և ՀԱՊԿ-ի պայմանագրային պարտավորությունների շրջանակում ՀՀ-ին օգնություն տրամադրելու դիմումներին։

Մինչդեռ, ընդդիմադիր պատգամավոր Գեղամ Մանուկյանն Ադրբեջանին զինելու մասին հարցը լսելով՝ հրաժարվեց մեկնաբանություն տալ։

Ուշագրավ է, որ ՌԴ արտաքին քաղաքական գերատեսչությունը լուռ է, երբ Բաքուն է Կիևին աջակցություն ցուցաբերում։ Ադրբեջանի հետ ռազմավարական համագործակցության փաստաթուղթ ստորագրած Ռուսաստանից, օրինակ, որևէ կերպ չեն քննադատել միայն 2023 թվականին Ադրբեջանից Ուկրաինա 7,6 մլն դոլարի օգնություն ուղարկելու որոշումը։

Ինչպե՞ս կարձագանքի ՀՀ-ն պաշտոնական մակարդակով ՌԴ-ի դժգոհությանը՝ դեռևս պարզ չէ։ Հայաստանի արտաքին գործերի նախարարությունն առայժմ չի մեկնաբանում Մոսկվայի բողոքի նոտան։ Factor TV-ն փորձեց պարզաբանումներ ստանալ գերատեսչության մամուլի խոսնակից, բայց մեր զանգերն անպատասխան մնացին։

Մանրամասները՝ տեսանյութում։

Նարեկ Կիրակոսյան