14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Եվրոպական կինոն եկել է Երևան․ 23 ֆիլմերի ցուցադրության մուտքն ազատ է. ՏԵՍԱՆՅՈՒԹ
Հասարակություն
30.05.2024 | 19:00
Եվրոպական արտադրության բազմաժանր 23 ֆիլմ՝ Երևանում․ Բելգիական «Օմեն» ֆիմլի ցուցադրությամբ Կինոյի տանը մեկնարկեց Եվրոպական ֆիլմերի փառատոնը, որը կշարունակվի մինչև հունիսի 7-ը։ Փառատոնն անցկացնում է Հայաստանում Եվրոպական միության պատվիրակությունը «Եվրոպայի օր» տոնակատարությունների շրջանակում:
ՀՀ-ում ԵՄ պատվիրակության ղեկավար Վասիլիս Մարագոսի խոսքով՝ փառատոնը յուրահատուկ միջոցառում է, իսկ կինոն՝ մշակութային երկխոսության զարգացման լավագույն գործիքներից։
«Ինչպես գիտեք Եվրոպական Միության նշանաբանն է՝ «Միավորված ենք բազմազանությամբ», ուստի` փառատոնին ներկայանում ենք ԵՄ տարբեր երկրների 23 տարբեր ժանրերի ֆիլմերով: Հատկանշականն այն է, որ փառատոնի փակմանը ցուցադրելու ենք հայ-լիտվական համատեղ արտադրության «Ավրորայի լուսաբացը» կինոնկարը, իսկ փառատոնային օրերին կցուցադրվի նաև ուկրաինական ֆիլմ, որն անդրադառնում է այն իրավիճակին, որում երկիրը հայտնվել է ռուսական ագրեսիայի հետևանքով»,- ընդգծեց Վասիլիս Մարագոսը։
«Օմեն» ֆիլմը, որի ցուցադրությամբ մեկնարկեց փառատոնը, պատմում է աֆրիկյան ծագումով ռեփեր-պոետի մասին։ Ֆիլմը մի շարք կինոփառատոններում մրցանակների է արժանացել։ Բելգիան այն ներկայացնելու է նաև Օսկարի։
«Ֆիլմը շատ հետաքրքիր է, պատմում է բազմազանության մասին, շատ կարևոր է, որ այն ուղերձ է հղում նաև հայ ստեղծագործողներին։ Ռեժիսոր Բալոժին երկար տարիներ երազել է այդ ֆիլմը ստեղծելու մասին և, ունենալով շատ փոքր բյուջե՝ կարողացել է նկարահանել այն՝ 23 օր անցկացնելով Աֆրիկայում։ Սա ուղերձ է հայ ստեղծագործողներին, որ չվախենան և պայքարեն երազանքների համար»,- ասաց ՀՀ-ում Բելգիայի արտակարգ և լիազոր դեսպան Էրիկ դե Մույնքը։
Փառատոնը համագործակցել է ՅՈՒՆԻՔ Հայաստանի հետ, ինչը Եվրոպա-Հայաստան գործակցության վառ օրինակ է։ ՅՈՒՆԻՔ Հայաստանի նախագահի խոսքով՝ ցանցը հնարավորություն է տալիս արժեքները գործողության մեջ տեսնել․ այն պետությունների, մարդկանց համագործակցություն է ընդհանուր արժեքների շուրջ:
«Մշակույթին, արվեստագետներին աջակցելը, միմյանց լսելն ու իրարից սովորելը, պատմություններ պատմելը հաճախ շատ բարդ է։ Անդամ պետությունների հետ հանդիպումների ժամանակ թեժ քննարկումներ, երբեմն անհամաձայնություններ ենք ունենում, բայց, ի վերջո, գալիս ենք եզրակացության, որ մշակութային արժեքներ և կամուրջներ կառուցելն ավելի կարևոր է, ուստի` ուրախ եմ, որ համագործակցում ենք այս փառատոնի հետ»,- նշեց ՅՈՒՆԻՔ Հայաստանի նախագահ Յան-Թագե Քյուլինգը։
Եվրոպական ֆիլմերի փառատոնը հանդիսատեսի համար ամենասպասված միջոցառումներից է, քանի որ այն բացառիկ հնարավորություն է մեծ էկրանին դիտելու կինոնկարներ, որոնք հաճախ չեն ցուցադրվում Հայաստանում՝ ընդգծում է ֆիլմերի ծրագրի համակարգող Վարվառա Հովհաննիսյանը։
Ի թիվս այլ ֆիլմերի` այսօր կցուցադրվի Շառլ Ազնավուրի և Մարկ դի Դոմենիկոյի հեղինակած «Ազնավուրը ըստ Շառլի» կինոնկարը բնօրինակ լեզվով՝ անգլերեն և հայերեն ենթագրերով։ Բացի ցուցադրություններից, փառատոնի շրջանակում կազմակերպվելու են հանդիպումներ և քննարկումներ կինոգետների մասնակցությամբ։ Ֆիլմերի ցուցադրության մուտքն ազատ է։
Մանրամասները՝ տեսանյութում։
Արփի Հակոբյան
