14.12.2025 | 10:10
Ահազանգեր են ստացվել տապալված ծառերի, սյուների, ինչպես նաև պոկված կառուցատարրերի վերաբերյալ․ ՆԳՆ
Հայաստանում և Ուկրաինայում 4 մարդ է ձերբակալվել կիբերհանցագործության դեմ խոշոր գործողության արդյունքում
Քաղաքականություն
30.05.2024 | 23:04
Չորս մարդ է ձերբակալվել Ուկրաինայում և Հայաստանում կիբերհանցագործությունների դեմ ուղղված խոշոր գործողության արդյունքում, Reuters-ի փոխանցմամբ՝ այս մասին հայտնել է Եվրոպոլը։
Գործողությունը, որն իրականացվել է մայիսի 27-ից 29-ն ընկած ժամանակահատվածում, Եվրամիության իրավապահ գործակալության կողմից որակվել է որպես «երբևէ ամենամեծ գործողությունը բոտցանցերի դեմ, որոնք առանցքային դերակատարում ունեն գումարի շորթման ծրագրերի տեղակայման գործում»: Բոտցանցերը ներառում են IcedID-ն, Smokeloader-ը, SystemBC-ն, Pikabot-ը և Bumblebee-ն:
Տեղեկացվում է, որ օպերացիան, որը կոչվում է «Endgame», նախաձեռնել և ղեկավարել են Ֆրանսիան, Գերմանիան և Նիդերլանդները: Դրանում ներգրավված են եղել նաև մի քանի այլ երկրներ, այդ թվում՝ Բրիտանիան, ԱՄՆ-ը և Ուկրաինան, ասվում է Եվրոպոլի հայտարարության մեջ:
Ձերբակալություններից մեկը կատարվել է Հայաստանում, իսկ մյուս երեքը՝ Ուկրաինայում, հայտնում է Եվրոպոլը՝ հավելելով, որ ավելի քան 2000 դոմեններ այժմ գտնվում են իրավապահների հսկողության տակ։
Ըստ քննիչների՝ գլխավոր կասկածյալներից մեկը կրիպտոարժույթով վաստակել է առնվազն 69 միլիոն եվրո (75 միլիոն դոլար)՝ վարձակալելով հանցավոր ենթակառուցվածքի կայքեր՝ վիրուսային ծրագրեր տեղադրելու համար:
