Թուրքիան ծավալապաշտական «Կապույտ հայրենիք» դոկտրինն ընդգրկել է դպրոցական ծրագրում

Թուրքիան պաշտոնապես հաստատել է դպրոցական նոր ուսումնական ծրագիրը, որը ներառում է «Կապույտ հայրենիք» (Mavi Vatan) դոկտրինը՝ կապված Էգեյան և Արևելյան Միջերկրական ծովում Անկարայի ծովային պահանջների հետ, գրում է Greek Reporter-ը։

9-րդ դասարանցիների համար աշխարհագրություն առարկան, ըստ նոր ծրագրի, կընդգծի «Թուրքիայի տեղորոշման առանձնահատկությունների կարևորությունը», կանցկացվեն քարտեզների քննարկումներ՝ կապված «Կապույտ հայրենիքի» հետ։

Կրթության նախարարությունն ասում է, որ «պետք է սերմանել հայրենասիրության արժեքը, ինչպես նաև Թուրքիայի արդարացված պայքարը այն պահանջների դեմ, որոնք անտեսում են նրա իրավական և աշխարհագրական իրավունքները Կղզիների ծովում (Էգեյան ծով) և Արևելյան Միջերկրականում։ Նշվում է  նաև Կիպրոսի կարևորությունը Թուրքիայի և թուրքական աշխարհի համար։

2018 թվականի հոկտեմբերին «Մավի Վաթան» (Կապույտ հայրենիք) քարտեզն առաջին անգամ ներկայացվել է Թուրքիայի պաշտպանության նախարար Հուլուսի Աքարի կողմից, որպես ծովային տարածք, որը զբաղեցնում է 462,000 քառակուսի կիլոմետր տարածք Էգեյան ծովում, Կիպրոսում, Արևելյան Միջերկրական և Սև ծովում։

Ինչ վերաբերում է Հունաստանին, դոկտրինը ներառում է բոլոր այն տարածքները, որտեղ Թուրքիան մինչ այդ հանդես էր գալիս ինքնիշխան իրավունքների և իրավասության պահանջներով Էգեյան ծովում, ինչպես նաև Արևելյան Միջերկրական ծովում, բայց նաև ավելի արևմուտք՝ դեպի Հունաստանի տարածքային ջրերի արտաքին սահմանները Կրետե, Կասոս և Կարպատոս կղզիներից 6 ծովային մղոն հեռավորության վրա: Այս քարտեզով Թուրքիան ոչ միայն չի ճանաչում Միջերկրական ծովում գտնվող հունական կղզիների մայրցամաքային շելֆերի իրավունքները, այլև վեց ծովային մղոնից ավելի տարածքային ջրերի իրավունքը: