11.08.2026 | 18:18
Արաիկ Եսայանն ազատվել է աշխատանքի և սոցիալական հարցերի նախարարի տեղակալի պաշտոնից
Ադրբեջանում ուսուցիչներին արգելվել է սոցցանցերում ներկայացնել դպրոցներում առկա խնդիրները
Քաղաքականություն
24.05.2024 | 23:16
Ադրբեջանում ուսուցիչներին արգելվել է սոցիալական ցանցերում ներկայացնել դպրոցներում առկա խնդիրները։ Տեղական լրատվամիջոցները հայտնում են, որ սա արտացոլված է գիտության և կրթության նախարարության կոլեգիայի կողմից հաստատված «Մանկավարժների էթիկական վարքագծի կանոններում»։
Նոր կանոնների համաձայն՝ ուսուցիչն «իր անձնական կյանքում պետք է պահպանի ազգային բարոյականության և հասարակական վարքագծի նորմերը, ձեռնպահ մնա հասարակության և անհատի իրավունքների ոտնահարմանը հանգեցնող գործողություններից, հոգ տանի երկրի բնության, պատմության և մշակութային ժառանգության պաշտպանության մասին»։
Բացի այդ, ուսուցիչներին արգելվում է «սոցիալական ցանցերի իրենց անձնական էջերում հրապարակել լուսանկարներ, աուդիո և վիդեո նյութեր, որոնք վարկաբեկում են ուսուցչի անունը և խաթարում ուսուցչի և այն հաստատության հեղինակությունը, որտեղ նա աշխատում է»։
Այս որոշումը սոցցանցերի ադրբեջանական տիրույթում քննարկումների առիթ է դարձել։ Հավելենք, որ համացանցում հաճախակի են տարածվում Ադրբեջանի տարբեր շրջանների անմխիթար վիճակում գտնվող դպրոցներից տեսանյութեր ու լուսանկարներ: Օրինակ՝ վերջերս սոցցանցերում տարածվել էին Գոբուստանի շրջանի Արաբշալբաշ գյուղի վթարային վիճակում գտնվող միջնակարգ դպրոցի կադրերը։
Էմմա Չոբանյան
