Դավաճանության մեջ մեղադրվողի կինը պնդում է՝ ցուցմունքը կորզել են ծեծով, ԱԱԾ-ն հերքում է․ ՏԵՍԱՆՅՈՒԹ

«Դիրքերից են կալանավորել, յոթ ամիս ԱԱԾ-ում է եղել, հետո տեղափոխել են Արթիկ, հիմա այնտեղ է»,- պատմում է կինը 2022 թվականի հոկտեմբերի 12-ից անազատության մեջ գտնվող ամուսնու մասին։ ԱԱԾ-ն պայմանագրային զինծառայողին մեղադրում է պետական դավաճանության համար։

Կինը, որի ինքնությունը չենք բացահայտում անվտանգության և չթիրախավորելու նկատառումներով, պատմեց, որ ամուսնու և բարերար ներկայացած կնոջ միջև շփումները նախ եղել են «Օդնոկլասնիկի» սոցիալական ցանցի, իսկ հետո՝ «Վոթսափ» հավելվածի միջոցով։ Ըստ նրա՝ զինվորականի հետ կապի են դուրս եկել մի կին և մի տղամարդ, որոնք, ըստ կնոջ, ներկայացել են քույր ու եղբայր։

ԱԱԾ-ն 2022 թվականի հոկտեմբերի 18-ին տեսանյութ էր տարածել, որով հայտնում էր պետական դավաճանության հերթական դեպքի բացահայտման մասին։ Ըստ հատուկ ծառայության՝ պայմանագրային զինծառայող Վ.Հ․-ն 2021-ի նոյեմբերից մինչև2022-ի մայիսն ընկած ժամանակահատվածում սոցիալական ցանցերի միջոցով օտարերկրյա հատուկ ծառայության աշխատակից հանդիսացող անձնին է հանձնել իր զորամասի տեղակայման վայրի, մարտական դիրքերի, դրանցում ծառայության անցկացման կարգի, զորամասի հաշվեկշռում գտնվող ավտոտեխնիկայի վերաբերյալ պետական և ծառայողական գաղտնիք կազմող տեղեկություններ, որոնց դիմաց օտարերկրյա հատուկ ծառայություններից երեք բանկային փոխանցումներով ստացել է 370 ԱՄՆ դոլար։

Զինծառայողի կինը պնդում է, որ ամուսինը խոստովանությունն արել է ԱԱԾ-ում կիրառված ֆիզիկական ճնշումների ներքո։

ԱԱԾ մամուլի կենտրոնից հերքեցին մեղադրանքերը, թե մեղադրյալներից ցուցմունքները վերցնում են ծեծի միջոցով։

Այդուհանդերձ, կինը չի հերքում, որ ամուսինն իսկապես ստացել է գումար, բայց պնդում է՝ ոչ թե օտար պետության հատուկ ծառայության աշխատակցից, այլ, իր փոխանցմամբ, բարերարից։

Չնայած զինվորականի կալանավորումից անցել է շուրջ երկու տարի, բայց մեղադրական դատավճիռ դեռևս չկա։ Նախաքննական մարմինը հանրությանը միայն տեղեկացնում է կալանավորումների մասին, իսկ ընթացքի մասին լռում է։ Նիկոլ Փաշինյանը վերջին ասուլիսի ժամանակ պատասխանելով Factor TV-ի հարցին՝ կարծիք հայտնեց, թե պետական դավաճանության մեջ մեղադրվողների մեծ մասը դատապարտվել է։

Factor TV-ն փորձեց պարզել, թե Նիկոլ Փաշինյանի այս հայտարարությանը որքանով է համապատասխանում իրականությանը։ Գլխավոր դատախազությունից ստացած գրավոր հարցման պատասխանից պարզեցինք, որ 2020-2024 թվականներին պետական դավաճանության համար մեղադրվողներից  ընդամենը երեք քաղաքացի է դատարանի որոշմամբ մեղավոր ճանաչվել։ Ստացվում է՝ Փաշինյանի պնդումը, թե մեծ մասը դատապարտյալի կարգավիճակ ունի, իրականությանը չի համապատասխանում։

Մանրամասները՝ տեսանյութում։

Նարեկ Կիրակոսյան